სააგენტოს სასწავლო-კვლევითი ცენტრის ორგანიზებით ჩატარებული შეხვედრების მიზანი მოსწავლეებში კონკურენციისა და მომხმარებლის უფლებების დაცვის საკითხებზე ცნობიერების ამაღლება და შესაბამისი ცოდნის ხელმისაწვდომობის გაზრდაა.შეხვედრების ფარგლებში, მოსწავლეები გაეცნენ მომხმარებლის ძირითად უფლებებს, მათი დაცვის მექანიზმებსა და კონკურენციის პოლიტიკის პრინციპებს. ყურადღება გამახვილდა ჯანსაღი კონკურენციის მნიშვნელობაზე, კონკურენციის კანონმდებლობის დარღვევის მაგალითებზე, მოვაჭრის ვალდებულებებზე, ონლაინ ვაჭრობის წესებზე, ნივთის 14 დღის განმავლობაში უპირობოდ დაბრუნების უფლებასა და საგარანტიო პირობებზე. პრეზენტატორები განიხილავდნენ ონლაინ ვაჭრობისას შესაძლო რისკების თავიდან აცილების პრევენციულ ზომებსაც.შეხვედრები ინტერაქტიულ ფორმატში, პრაქტიკული მაგალითებისა და კითხვა-პასუხით  წარიმართა. მოსწავლეები გაეცნენ სააგენტოს საქმიანობასა და საგანმანათლებლო რესურსებს, მათ შორის, კონკურენციის ონლაინ ლექსიკონსა და ფასების შედარების პორტალს- eKalata.gov.ge-ს, რომელიც მომხმარებლებს სხვადასხვა სავაჭრო ქსელში ფასების შედარებისა და ინფორმირებული არჩევანის გაკეთების შესაძლებლობას აძლევს.საჯარო სკოლებში საინფორმაციო-საგანმანათლებლო ღონისძიებების ჩატარება GCCA-სა და საქართველოს განათლების, მეცნიერებისა და ახალგაზრდობის სამინისტროს შორის გაფორმებული მემორანდუმით გათვალისწინებული თანამშრომლობის ერთ-ერთი მიმართულებაა. პროგრამის ფარგლებში განსაკუთრებული ყურადღება ეთმობა მოწყვლადი ჯგუფების, მათ შორის ეთნიკური უმცირესობების წარმომადგენელი მოსწავლეებისა და შეზღუდული შესაძლებლობის მქონე პირების, ინფორმირებასა და მათთვის საგანმანათლებლო შესაძლებლობების ხელმისაწვდომობის გაზრდას.

1793610682

ციფრული ფინანსების საერთაშორისო კონფერენცია ფინანსური სექტორის, ბიზნესის, საერთაშორისო ფინანსური ინსტიტუტებისა და ტექნოლოგიური კომპანიების წარმომადგენლებს აერთიანებს. ღონისძიება ციფრული ფინანსების განვითარების, ფინანსურ სექტორში ინოვაციების დანერგვისა და საერთაშორისო თანამშრომლობის გაღრმავების საკითხებზე მსჯელობისა და გამოცდილების გაზიარების პლატფორმაა.მისასალმებელ სიტყვაში ნინო ჯელაძემ საქართველოს ეკონომიკისა და ფინანსური სექტორის განვითარებაზე, ქვეყნის საინვესტიციო მიმზიდველობასა და რეგიონულ ფინანსურ ჰაბად ჩამოყალიბების პოტენციალზე ისაუბრა. საქართველოს გეოგრაფიული მდებარეობა და ევროპისა და აზიის დამაკავშირებელი ისტორიული როლი ქვეყანას რეგიონული ფინანსური ინტეგრაციისა და ტრანსსასაზღვრო თანამშრომლობის მნიშვნელოვან ცენტრად ჩამოყალიბების შესაძლებლობას აძლევს.„საქართველოს საბანკო სექტორი კარგად კაპიტალიზებული და ლიკვიდურია, რაც ქვეყნის ეკონომიკური ზრდის მხარდაჭერის მნიშვნელოვან საფუძველს ქმნის. ამასთან, ქართული ბანკები აფართოებენ საქმიანობას ქვეყნის ფარგლებს გარეთ და აძლიერებენ რეგიონულ პოზიციებს. 2025 წელს საქართველოში განხორციელებული პირდაპირი უცხოური ინვესტიციების დაახლოებით 33% ფინანსურ სექტორზე მოდიოდა, რაც სექტორისა და ქვეყნის განვითარების პოტენციალის მიმართ საერთაშორისო ინვესტორების ნდობას ადასტურებს“, - აღნიშნა ნინო ჯელაძემ.კონფერენციაზე სების ვიცე-პრეზიდენტმა ეროვნული ბანკის მიერ ფინანსური ინოვაციების განვითარების მიმართულებით გადადგმულ ნაბიჯებზე ისაუბრა, მათ შორის, ციფრული ბანკების ლიცენზირების ჩარჩოს დანერგვაზე, რომლის ფარგლებშიც საქართველოში უკვე სამი ციფრული ბანკი ოპერირებს, ასევე, ვირტუალური აქტივის მომსახურების პროვაიდერებისთვის (VASP) სავალდებულო რეგისტრაციისა და ზედამხედველობის სრულყოფილი ჩარჩოს შექმნაზე, რომლის საფუძველზეც რეგისტრირებულია 40-ზე მეტი პროვაიდერი, მათ შორის საერთაშორისო ოპერატორები. ნინო ჯელაძემ ასევე ყურადღება გაამახვილა სტეიბლკოინების პირველადი შეთავაზების სპეციალურ მარეგულირებელ ჩარჩოზეც, რომელიც ბაზარზე დაშვების, რეზერვებით უზრუნველყოფის, გამჭვირვალობისა და მომხმარებელთა დაცვის მოთხოვნებს განსაზღვრავს. მისი თქმით, ეროვნული ბანკის მიზანია, ინოვაციების ხელშეწყობა მკაფიო რეგულაციებსა და ეფექტიან ზედამხედველობას შეუთავსოს, რაც ციფრული ფინანსების მიმართ ნდობისა და ფინანსური სისტემის მდგრადობის უზრუნველყოფას ემსახურება.„ფინანსების მომავალი მხოლოდ ახალი ტექნოლოგიების დანერგვას არ გულისხმობს. ეს ნიშნავს ისეთი ფინანსური სისტემის შექმნას, რომელიც უფრო ხელმისაწვდომი, ეფექტიანი, მდგრადი და სანდოა. საქართველოს ეროვნულ ბანკში გვესმის, რომ ინოვაციები და ფინანსური სტაბილურობა ერთმანეთთან თანხვედრაში უნდა იყოს. ჩვენი პასუხისმგებლობაა, ხელი შევუწყოთ გარემოს, სადაც ახალი იდეები გაჩნდება, ბიზნესი განვითარდება და მომხმარებლები უკეთესი ფინანსური მომსახურებით ისარგებლებენ, ამავდროულად კი დაცული იქნება ფინანსური სისტემის მთლიანობა, უსაფრთხოება და სტაბილურობა“, - აღნიშნა ნინო ჯელაძემ.

1793610522

მოკვლევა ჩატარებულია მხოლოდ ღია წყაროებზე დაყრდნობით და გამჭვირვალობის უმაღლესი სტანდარტების შესაბამისად.სექტემბერში გამოქვეყნდა „ბანკები და ფინანსების“ ჟურნალისტური მოკვლევა, რომელიც ბრიტანულ-ქართული აკადემიისა მინორიტარი აქციონერისა და ყოფილი დირექტორის ნათია ჯანაშიას და მისი ქმრის აქამდე გაუცხადებელ ქონებას ეხებოდა. საუბარია, თბილისში, ლისის ტბის მიმდებარედ, ე.წ. მილიონერების ახალ უბანში, მაგნოლიას ქუჩაზე მდებარე გრანდიოზულ სასახლეს, რომლის ფართობიც 3820 კვადრატულ მეტრს შეადგენს. სასახლე ცოლ-ქმრის საკუთრებაშია და გაფორმებულია დავით ცეცხლაძეზე. მოკვლევის შედეგად დადგინდა, რომ ეს სასახლე ცოლ-ქმარს ღიად არსად აქვთ დადეკლარირებული. გამოცდილი რეალტორებისა და უძრავი ქონების სპეციალიზებული პლატფორმების თანამშრომლების ჩაღრმავებული ინტერვიუირების საფუძველზე დადგინდა ასევე ჯანაშიას მაგნოლიას გრანდიოზული სასახლის დაახლოებითი სალიკვიდაციო ღირებულებაც, რომელმაც 20 000 000 (ოცი მილიონი) ლარი შეადგინა.ნათია ჯანაშიას ქმრის სახელზე რეგისტრირებულმა მაგნოლიას გრანდიოზული სასახლის აღმოჩენამ მოკვლევის ახალ ეტაპზე გადაგვიყვანა. კონკრეტული საძიებო სისტემების საშუალებით მივაგენით ლისის ტბის სასახლესთან შედარებით მომცრო ვილას, რომელიც ნათია ჯანაშიას მაგნოლიას გრანდიოზულ სასახლეს ღირებულებითაც ჩამოუვარდება, მაგრამ მისი ღირებულება ასევე რამდენიმე მილიონია.ნათია ჯანაშიას მრავალრიცხოვან ინტერვიუში, მის მიერ კონტროლირებად გამოცემებში ეს ექსკლუზიური ვილა არსად აქვს ნახსენები და შესაბამისად, გაცხადებული აქტივად არ არის წარმოდგენილი. ვილა ცოლ-ქმარს გასაიდუმლოებული აქვს და უახლოესი გარემოცვაც კი არ არის ინფორმირებული ამ აქტივის შესახებ. ვილა არ ფიგურირებს ჯანაშია-ცეცხლაძის უძრავი ქონების ჩამონათვალშიც.ექსკლუზიური ვილა „კაჭრეთის ამბასადორის“ სივრცეშია განლაგებული, რაც ამ უძრავ ქონებას  ღირებულებას ექსპონენციალურად მატებს. მით უმეტეს, თუ გავითვალისწინებთ სულ ახლახანს გაცხადებულ ფაქტს „ამბასადორის“ ტერიტორიაზე უნიკალური ინფრასტრუქტურული პროექტის - საავიაციო სოფლის, სარეკრეაციო და ტურისტულ სივრცეებისა და აეროდრომის მშენებლობის შესახებ. პროექტის ღირებულება 15 მილიონი დოლარია.ბანკები და ფინანსების მკვლევრების მიერ მოკვლეულია ვილის მეპატრონე და დადგენილია ექსკლუზიური ვილის სავარაუდო ღირებულება.ექსკლუზიური ვილა „ამბასადორი კაჭრეთის“ საუკეთესო ლოკაციაზე 1 677 კვადრატულ მეტრის მიწის ფართობზეა განთავსებული. საკუთრივ ნაგებობის ფართი 297,6 კვადრატული მეტრია.ვილა „ბრიტანულ - ქართული აკადემიის“ მინორიტარი აქციონერის, ნათია ჯანაშიას ოჯახის საკუთრებაა. ოჯახმა იგი 2020 წლის ივლისში შეიძინა, მას შემდეგ, რაც „ბრიტანულ-ქართული აკადემიის“ 70% მიყიდა ინვესტორს, ‘საქართველოს განათლების ჯგუფს“ და 30 მილიონი ლარი მიიღო წილის საფასურად.  როგორც „მაგნოლიას გრანდიოზული სასახლის შემთხვევაში“, აქაც აღნიშნული უძრავი ქონების ოფიციალური მფლობელი ნათია ჯანაშიას ქმარი, დავით ცეცხლაძეა.ვილა ექსკლუზიური ხასიათისაა, რამდენადაც განთავსებულია, ვილათა უმრავლესობისგან განსხვავებით, მიწის გაცილებით დიდ ნაკვეთზე. მისი ექსკლუზიურობა, დამატებით, იქედანაც გამომდინარეობს, რომ იგი კომპლექსის ცენტრალური რეკრეაციული სივრცეების (ამბასადორის დიდი აუზები, სასადილო და საბანკეტო დარბაზები, ჩოგბურთის კორტები, გოლფის მოედანი და სხვ) უშუალო სიახლოვეს მდებარეობს.რაც შეეხება, ვილის საბაზრო ფასს, - რამდენადაც საუბარი გვაქვს 1677 კვ.მეტრის მიწის ფართობზე, ანუ კომპლექსში განთავსებული ვილების უმრავლესობისგან განსხვავებით, გაცილებით დიდ ფართობზე, ეს მის საბაზრო ღირებულებას უდავოდ ზრდის.ზოგადად, კაჭრეთის ვილებში კვადრატულის ფასი – $3500-დან იწყება. მისი შემდგომი ზრდა, როგორც აღინიშნა, დამოკიდებულია კომპლექსის ლანდშაფტში საკუთრივ ვილის ლოკაციაზე, მიწის ნაკვეთის სიდიდეზე და როგორც ეზო-მიდამოს, ისე ნაგებობის მოპირკეთებისა და კეთილმოწყობის ხარისხზე.ამ ფაქტორების გათვალისწინებით, ნათია ჯანაშიას ვილის შემთხვევაში, მისი საბაზრო ფასი კვადრატულთან მიმართებით $ 4 000-ს სცდება და  შესაბამისად, მთლიანი ღირებულება 5 მილიონ ლარს აჭარბებს. ექსკლუზიური ვილის ღირებულებაში შესულია აგრეთვე მიწის ღირებულებაც.ზოგადად, „ამბასადორი კაჭრეთის“ კომპლექსი ერთ-ერთი ყველაზე ძვირადღირებული საცხოვრებელი და რეკრეაციული სივრცეა საქართველოში. რეალტორები მას ერთ-ერთ საუკეთესო ლოკაციად მიიჩნევენ, სადაც უძრავ ქონებაში დაბანდება უპირობოდ სარფიანი გადაწყვეტილებაა.საპროექტო ნახაზებიდან ჩანს, რომ ნათია ჯანაშიას და მის ქმარს ვილის ფართობთან დაკავშირებით პრობლემები შეექმნათ და არქიტექტორებს მისი გადიდება დაუკვეთეს.შესაბამისად, განაშენიანების ფართობი და საცხოვრებელი ფართი გაიზარდა ავტოფარეხისა და  საზაფხულო ფართის ხარჯზე.მიწის (უძრავი ქონების) საკადასტრო კოდი N 51.20.63.000.530„ამბასადორი კაჭრეთის“ კომპლექსი მდებარეობს კახეთში, თბილისიდან დაახლოებით 80  კილომეტრში (1-1.5 საათის სავალზე) და მასშტაბური, 4-ვარსკვლავიანი იშვიათი საკურორტო სივრცეა, სადაც მოწყობილია საერთაშორისო სტანდარტების პროფესიონალური გოლფის მოედანი. იქვე ფუნქციობს გოლფის აკადემია. კომპლექსში განთავსებულია ჩოგბურთის კორტები,კალათბურთისა და ფეხბურთის მოედნები, ბოულინგის ცენტრი. ბილიარდი და მაგიდის ჩოგბურთი. ტირი (მშვილდოსნობა / სროლა). დამსვენებლებს და მაცხოვრებლებს შეუძლიათ ცხენით ჯირითიც.კომპლექსის მშვენებაა ღია და დახურული აუზები, მათ შორის ოლიმპიური ზომის აუზი და სპა, ბარები და საბავშვო ზონები.კომპლექსი მოიცავს რამდენიმე კორპუსს (ისტორიულ/ძველ და ახალ თანამედროვე ფრთას)  და ვილებს, რომლებსაც მესაკუთრეები იყენებენ, როგორც საცხოვრებლად, ისე იჯარის წესით გაქირავებისთვის და შემოსავლის გენერირებისთვის.შეგახსენებთ, ნათია ჯანაშია „ბრიტანულ-ქართული აკადემიის“ მინორიტარი აქციონერია და წილის 30%-ს ფლობს. მან  2019 წელს „აკადემიის“ 70% გაყიდა „საქართველოს განათლების ჯგუფზე“.  ამ გარიგების ღირებულება 29,3 მილიონი ლარი იყო. ეს თანხა, გარიგების გაფორმებისთანავე, ორ თანაბარ ნაწილად, საბანკო ანგარიშებზე აესახათ ნათია ჯანაშიასა და დავით ცეცხლაძეს.ინვესტორის გადაწყვეტილებით, მომდევნო 5 წელი, ნათია ჯანაშია და დავით ცეცხლაძეს კვლავ თავად უძღვებოდნენ აკადემიის მენეჯმენტს. ამაში, ისინი ჯამურად, წლიური ხელფასის სახით, 1 მილიონ ლარს იღებდნენ. შესაბამისად, ცოლ-ქმარმა 5 წელიწადში 5 მილიონი ლარი მიიღო ჯამაგირად.2024 წელს, ხელშეკრულების ვადის ამოწურვის შემდეგ, ინვესტორმა ნათია ჯანაშიას და დავით ცეცხლაძეს აღარ გაუგრძელა მენეჯმენტ-კონტრაქტი, რის ფონზეც ნათია ჯანაშიამ ქმართან ერთად ინვესტორის წინააღმდეგ დავა წამოიწყეს.ინვესტორის მიერ „აკადემიაში“ ჩატარებული საერთაშორისო აუდიტის თანახმად, რომელიც დიდი ოთხეულის წევრმა აუდიტორულმა კომპანიამ განახორციელა, გამოირკვა, რომ ნათია ჯანაშიას და დავით ცეცხლაძის მენეჯმენტის პერიოდში დაფიქსირებულია „აკადემიის“ კუთვნილი განსაკუთრებით დიდი ოდენობის სახსრების გაფლანგვა/მიტაცების  შესაძლო ფაქტი. გაფლანგვა/მიტაცების მოცულობა 4 მილიონ აშშ დოლარს აჭარბებს. აღნიშნულ ფაქტთან დაკავშირებით, ფინანსთა სამინისტროს საგამოძიებო სამსახურში საქმე #092060925001 არის აღძრული და გამოძიება მიმდინარეობს.„ბანკები და ფინანსები“ აგრძელებს დაფარული და გასაიდუმლოებული აქტივების მოძიებას საქართველოში და მის ფარგლებს გარეთ და დაინტერესებულ საზოგადოებას გამჭვირვალედ და ღია წყაროებზე დაყრდნობით მიაწოდებს დეტალურ ინფორმაციას.

1793609291

ცესკოს ინფორმაციით, ხარისხის სისტემის შეფასების მიზნით აუდიტი ორ ეტაპად განხორციელდა. შპს „მენეჯმენტის სისტემები“-ს აუდიტორის მიერ 2026 წლის 24 ივლისს განხორციელდა შიდა აუდიტი, ხოლო 2026 წლის 2 სექტემბერს, საერთაშორისო აუდიტორის (LL-C (Certification) Czech Republic a.s.) მიერ დისტანციურად განხორციელდა საკონტროლო აუდიტი. ცესკომ წარმატებით გაიარა ორივე სახის აუდიტი და შეინარჩუნა საერთაშორისო ISO 9001:2015 სერტიფიკატი.„საერთაშორისო აუდიტორის შეფასებით, საქართველოს საარჩევნო ადმინისტრაციის ხარისხის მართვის სისტემის (QMS) დადებით მხარეებსა და უპირატესობებს შორის ხაზგასმით აღსანიშნავია ადმინისტრაციის შესაძლებლობა, გაუმკლავდეს რთულ და ცვალებად გარემოს: „პოლიტიკური რყევების, დეზინფორმაციის გავრცელების მცდელობისა და საინფორმაციო ზეწოლის მიუხედავად, საარჩევნო ადმინისტრაცია ეფექტიანად ასრულებს ქართველი ხალხის წინაშე აღებულ საკონსტიტუციო ვალდებულებებს“.აუდიტის ფარგლებში დოკუმენტირებული მენეჯმენტის სისტემის შესაბამისობა შეფასდა მაღალი პროფესიული სტანდარტებით. დადასტურდა, რომ ორგანიზაციის მენეჯმენტის სისტემას შეუძლია დააკმაყოფილოს შესაბამისი სტანდარტების მოთხოვნები და მიაღწიოს აკრედიტებული სერტიფიცირებისთვის მოსალოდნელ შედეგებს, როგორც ეს მითითებულია ISO-IAF-ის კომუნიკეში, აკრედიტებული სერტიფიცირების შესახებ.აუდიტორის შეფასებით, ორგანიზაცია აკმაყოფილებს და სათანადოდ ახორციელებს მენეჯმენტის სისტემის მოთხოვნებს და შეუძლია უზრუნველყოს მომსახურების უწყვეტი მიწოდება მომხმარებლის მოთხოვნებთან, შესაბამის კანონებთან და რეგულაციებთან შესაბამისობაში, მომხმარებლის კმაყოფილების ამაღლების მიზნით. აღნიშნული დასკვნა გაკეთებულია სტანდარტის ცალკეული მოთხოვნების შესრულების დონის შეფასების საფუძველზე, რაც დასტურდება ანგარიშის შესაბამისობის მატრიცით. აუდიტის მიზნები წარმატებით არის მიღწეული.აუდიტის შედეგად კიდევ ერთხელ დადასტურდა, რომ ცესკოს საქმიანობის ძირითადი მიმართულებები - სტრატეგიული მიზნები და ამოცანები, მიმდინარე აქტივობები და პროექტები, შეთავაზებული სერვისები, საქმიანობის მონიტორინგი და ანგარიშგების მექანიზმები შეესაბამება ხარისხის მენეჯმენტის მიერ მოთხოვნილ ყველა სტანდარტს. ეს კი ადასტურებს, რომ ხარისხის მართვა საარჩევნო ადმინისტრაციის ყოველდღიური საქმიანობისა და ინსტიტუციური განვითარების მნიშვნელოვანი ნაწილია.ISO-ს სტანდარტი წარმოადგენს ხარისხის მართვის ერთ-ერთ ყველაზე აღიარებულ საერთაშორისო ჩარჩოს. იგი ორგანიზაციებს საქმიანობის სისტემატური გაუმჯობესების, პროცესების ეფექტიანად მართვის, გამჭვირვალობისა და მომხმარებელზე ორიენტირებული მომსახურების უზრუნველყოფაში ეხმარება.აღსანიშნავია, რომ ცესკოსთვის ხარისხის მართვის საერთაშორისო სტანდარტის შენარჩუნება ნიშნავს არამხოლოდ ეფექტიანი შიდა მენეჯმენტის დემონსტრირებას, არამედ საზოგადოების წინაშე ანგარიშვალდებულებისა და გამჭვირვალობის მაღალი დონის უზრუნველყოფას. ეს კიდევ ერთი დასტურია იმისა, რომ საარჩევნო ადმინისტრაცია მოქმედებს საერთაშორისო პრინციპების გათვალისწინებით და საუკეთესო პრაქტიკაზე დაყრდნობით.ცესკომ ISO სერტიფიკატი პირველად 2019 წელს მიიღო, რითაც დადასტურდა, რომ ცესკოს ხარისხის მართვის სისტემა და ბიზნესპროცესები სრულად შეესაბამებოდა საერთაშორისო სტანდარტის - ISO 9001:2015 მოთხოვნებს. ამასთან, საქართველოს ცენტრალური საარჩევნო კომისია პირველი საარჩევნო ადმინისტრაცია იყო აღმოსავლეთ პარტნიორობის ქვეყნებს შორის, რომელმაც აღნიშნული სერტიფიკატი მიიღო.საერთაშორისო სტანდარტის მოთხოვნებთან შესაბამისობის მორიგი დადასტურება ცესკოსთვის ხარისხის მართვის უწყვეტი პროცესის, ინსტიტუციური განვითარებისა და საქმიანობის მუდმივი გაუმჯობესების კიდევ ერთი მნიშვნელოვანი ეტაპია“, - ნათქვამია გავრცელებულ ინფორმაციაში.

1793608285

ნინო ჯელაძემ სიტყვით გამოსვლისას ყურადღება გაამახვილა მცირე და საშუალო ბიზნესისთვის დაფინანსების ხელმისაწვდომობის მნიშვნელობაზე და აღნიშნა, რომ ფაქტორინგი კომპანიებს საშუალებას აძლევს, საქონლის მიწოდების ან მომსახურების გაწევის შედეგად წარმოშობილი მოთხოვნები დაფინანსების წყაროდ გამოიყენონ და გადახდის მოლოდინის პერიოდში საჭირო საბრუნავი კაპიტალი უფრო სწრაფად მიიღონ. აღნიშნული მექანიზმი ხელს უწყობს ფულადი ნაკადების მართვის გაუმჯობესებას, მომწოდებლებთან ანგარიშსწორებასა და ბიზნესის გაფართოებას.„ეროვნული ბანკის მიზანია საქართველოში ფაქტორინგი დაფინანსების პრაქტიკულ და სანდო წყაროდ აქციოს. ერთობლივი მუშაობით შევძლებთ, დავეხმაროთ ბიზნესს საბრუნავი კაპიტალის უფრო ეფექტიანად მართვაში, გავაფართოოთ შესაძლებლობები ფინანსური სექტორისთვის და ხელი შევუწყოთ დასაქმებასა და ეკონომიკურ ზრდას“,- აღნიშნა ნინო ჯელაძემ.ნინო ჯელაძემ ხაზი გაუსვა რომ საქართველოში ფაქტორინგის ბაზრის განვითარებისთვის მნიშვნელოვანი ნაბიჯი 2026 წლის 6 აპრილს „ფაქტორინგის შესახებ“ კანონის მიღება გახდა, რომელმაც ბაზრის განვითარების სამართლებრივი საფუძველი შექმნა. მისი შეფასებით, ბაზრის მდგრადი განვითარებისთვის მნიშვნელოვანია შესაბიმისი მარეგულირებელი და საზედამხედველო ჩარჩოს ჩამოყალიბება, ტექნოლოგიური ინფრასტრუქტურის განვითარება და ბაზრის მონაწილეთა ცნობიერების ამაღლება.“საქართველოს ეროვნული ბანკი ფაქტორინგის ბაზრის განვითარებაზე მუშაობას რამდენიმე ძირითადი მიმართულებით აგრძელებს. მათ შორისაა ფაქტორინგის კომპანიებისა და პლატფორმების საქმიანობის მარეგულირებელი წესების მომზადება, ბაზრის საჭიროებებზე მორგებული ტექნოლოგიური ინფრასტრუქტურის განვითარების ხელშეწყობა და ფინანსური სექტორისა და ბიზნესის ინფორმირებულობის გაზრდა”, - განაცხადა მან.ნინო ჯელაძემ ასევე ისაუბრა საჯარო და კერძო სექტორებს, საერთაშორისო პარტნიორებსა და ფინანსურ ინსტიტუტებს შორის თანამშრომლობის მნიშვნელობაზეც. მისი განცხადებით, სამართლებრივი და ტექნოლოგიური საფუძვლების შექმნასთან ერთად, ფაქტორინგის ბაზრის წარმატებული განვითარებისთვის აუცილებელია ჯანსაღი კონკურენცია, მომსახურების მიმწოდებლების შესაბამისი კომპეტენცია და ბიზნესის საჭიროებებზე მორგებული ფინანსური პროდუქტები.„ვაჭრობის დაფინანსების მომავალი: ფაქტორინგი და მიწოდების ჯაჭვის დაფინანსება“ - ღონისძიება საქართველოს ეკონომიკური განვითარების კორპორაციისა და ფაქტორინგის საერთაშორისო ორგანიზაციის (FCI) ორგანიზებით იმართება, ორდღიანი სამუშაო შეხვედრის მიზანია საქართველოში ფაქტორინგის ბაზრის განვითარების ხელშეწყობა, საერთაშორისო გამოცდილების გაზიარება და ბიზნესისთვის დაფინანსების ალტერნატიული მექანიზმების ხელმისაწვდომობის გაზრდა.

1793604479

ამჯერად, ბანკმა თიბისი განაწილების პირობები გააუმჯობესა - მომხმარებლებს შენაძენის ღირებულების განაწილება უკვე უფრო ხანგრძლივად, 4 თვის ნაცვლად 6 თვეზე შეუძლიათ, ეფექტური 0%-ით, დამატებითი ხარჯისა და გაძვირების გარეშე.განაწილება თიბისის ინოვაციური გადახდის მეთოდია, რომელიც მომხმარებლებს შენაძენების ღირებულების ეტაპობრივად დაფარვისა და სურვილების მარტივად ასრულების შესაძლებლობას აძლევს.განაწილების ლიმიტის შემოწმება შესაძლებელია თიბისის მობაილბანკში - შედით და ნახეთ რა ლიმიტია ხელმისაწვდომი თქვენი სურვილების ასასრულებლად.

1793603272