ნანახია: 719

გაზეთ Financial Times -ის ცნობით, წლის დასაწყისიდან დღემდე მსოფლიოს ყველაზე მსხვილმა კომპანიებმა ობლიგაციების გაყიდვებით რეკორდულად მაღალი 353 მლრდ. დოლარი მოიძიეს. ეს მაჩვენებელი 224 მლრდ. დოლარით მეტი ვალდებულებაა, რომლის დაფარვაც კვარტლის ბოლომდე მოუწევთ. გართულებულ საბანკო დაკრედიტების პირობებში კორპორაციები ცდილობენ, როგორმე ლიკვიდობა შეინარჩუნონ. ამ რესურსების ნაწილი შეიძლება მიმართული იქნას სხვა კომპანიებთან შეერთების ან შთანთქმის გარიგებებზე. ასეთ გაურკვეველ პირობებში ისინი "ფულიან ტომრებზე" სხედან და მათი გამოყენებისგან თავს იკავებენ, რაც შეიძლება ეკონომიკურ აქტივობაზე ნეგატიურად აისახოს.
ბრიტანული გამოცემების ინფორმაციით, წლის დასაწყისში მთელი მსოფლიოს მასშტაბით კომპანიებმა სავალდებულო ფასიანი ქაღალდების გაყიდვით 334 მლრდ. მოზიდვა შეძლეს. სახსრების მიზიდვის ასეთ გზას ის უმსხვილესი კომპანიები მიმართავენ, რომლებიც ინვესტირების მაღალი მაჩვენებლებით გამოირჩევიან. Dealogic-ის მონაცემებს თუ დავეყრდნობით, პირველი კვარტლის ბოლოსათვის, საერთაშორისო კორპორაციებს ამ თანხიდან 129 მლრდ. დოლარის ვალდებულების დაფარვა მოუწევთ.
ექსპერტები აღნიშნავენ, რომ მოჭარბებული რესურსების მოზიდვით, კომპანიები ამ ნაბიჯით გართულებული საბანკო დაფინანსების ჩანაცვლებას და საკრედიტო რეიტინგის რისკების შემცირებას ცდილობენ.
"კომპანიები მასშტაბურ კაპიტალს იზიდავენ იმ პირობებში, როდესაც ბანკები კლიენტებთან მიდგომას ამკაცრებს. ბევრ კომპანიას ღია საკრედიტო ხაზები ჰქონდა ბანკებისგან, რომლებიც კრიზისის გამო მიუწვდომელია ან პირობები გახდა მათთვის მიუღებელი. რეიტინგული სააგენტოები აცხადებდნენ, რომ კომპანიების რეიტინგის შესანარჩუნებლად, უნდა მოხდეს ამ ხაზების ჩანაცვლება და მათი შემცვლელის მოძებნა, " - განაცხადა იულიუს ბაერ მარკუს ალენსპახმა.
კონკრეტული კომპანიების მხრიდან კიდევ ერთი მიზეზი ასეთი მასშტაბური კორპორატიული ურთიერთგარიგებებისა შესაძლოა მომავალში სააქციო ბაზარზე კრახის თავიდან აცილებისათვის მზადების სურვილით იყოს გამოწვეული.
ექსპერტები აღნიშნავენ, რომ ბევრი კომპანიის ხელმძღვანელები ფიქრდებიან საკუთარ შესყიდვებზე. ამას გარდა, არსებობს იმის ალბათობაც, რომ კრიზისის კიდევ გაღრმავების შემთხვევაში კომპანიებს ფინანსური რესურსები შესაძლოა თვითგადარჩენისთვის დასჭირდეს. "იმ სიტუაციაში, როდესაც შეუძლებელია დარწმუნებით მომავალი ხარჯების გათვალისწინება, კორპორაციებს სურთ თავიანთ ლიკვიდობაში დარწმუნებულნი იყვნენ. ამიტომ იმის ნაცვლად, რომ მათ კაპიტალდაბანდებები განახორციელონ ან აქტივები შეისყიდონ, კომპანიები ამ საშუალებებს სათადარიგოდ იყენებენ, რაც საბოლოოდ ეკონომიკურ სიტუაციაზე ნეგატიურად აისახება, " - თვლის ექსპერტი ალენსპახი.