ნანახია: 757

იაპონიის ეკონომიკა ძალებს სწრაფი ტემპით კარგავს

ექსპორტზე დამოკიდებული იაპონიის ეკონომიკა განსაცვიფრებელი სიჩქარით ეფლობა რეცესიაში. ვარდნის ტემპით მან ამერიკის შეერთებულ შტატებსა და ევროპას გადაასწრო. მშპ-ს მონაცემები ერთიმეორეზე უარესია, ხოლო სავაჭრო ბალანსის დეფიციტი ბევრად არ ჩამოუვარდება რეკორდულ მაჩვენებელს - ტრილიონ იენს. მთავრობას საფონდო ინდექსების შემდგომი გაუფასურების ეშინია და ბაზრების მხარდასაჭერად მზად არის კომპანიების ყველაზე გაუფასურებული აქციები შეისყიდოს. ამ კვირაში იაპონიის ეკონომიკამ ცოტა ამოისუნთქა - იენი შედარებით გაუფასურდა.
2008 წლის განმავლობაში იენი დოლართან მიმართებაში 23%-ით გამყარდა. ეროვნული ვალუტის გამყარებამ იაპონელ მწარმოებლებს პრობლემები მოუმატა, რაც იაპონური პროდუქციის უცხოურ ბაზარზე ვაჭრობის შემცირებით გამოიხატა. აღსანიშნავია, რომ იაპონურ ავტომობილებსა და ელექტრო ტექნიკაზე აშშ-სა და ევროკავშირის წევრ ქვეყნებში მოთხოვნა არც ისე დიდია. წინა კვირას ზედიზედ ორი დღის განმავლობაში ფასებმა ყველაზე მეტად დაიწიეს ბოლო სამი თვის განმავლობაში, რამაც ექსპორტიორებს ამოსუნთქვის საშუალება მისცა. მსოფლიოში ყველაზე მსხვილი ავტომწარმოებლის Toyota Motors-ის აქციების ფასმა 4.2%-ით მოიმატა, ხოლო Honda Motors-ის ფასიანი ქაღალდები 8.1%-ით გაძვირდა.
ვაჭრობის შედეგად ნიკეის ინდექსმა 225 შეადგინა. მასზე არ იმოქმედა ექსპორტის რეკორდულმა შემცირებამ, რომელიც იანვარში 45.7%-ით დაეცა. ექსპორტი აშშ-ში უპრეცედენტოდ, 52.9%-ით, შემცირდა. დაახლოვებით იგივე მაჩვენებლებია აზიურსა და ევროპულ ბაზრებზე.
ბოლო 26 წლის განმავლობაში ნიკეის ინდექსი თითქმის ყველაზე დაბალ მაჩვენებლამდეა დასული. იაპონიის ფინანსთა მინისტრმა კაურო იოსანომ განაცხადა, რომ ხელისუფლებას სახელმწიფოს მიერ აქციების შესყიდვის შესახებ გეგმის გაფართოება შეუძლია, რაც მთელი საფონდო ბაზრის მხარდაჭერა იქნება. ჯერჯერობით ხელისუფლება მხოლოდ საბანკო სექტორის ფასიანი ქაღალდებითაა დაინტერესებული. წინა წლის მშპ-მ, რომელიც 12.7%-ით შემცირდა, 1974 წლის რეკორდი გაიმეორა. ექსპერტების პროგნოზებით, მიმდინარე წლის პირველი აპრილიდან მშპ კიდევ უფრო შემცირდება.