ნანახია: 567

ევროპული ბიზნესი მომავალს იმედით უყურებს

ევროპა კრიზისისგან გამოწვეული შოკიდან თანდათანობით გამოდის. საშუალო და მცირე ბიზნესის ხელმძღვანელები ცდილობენ არა მხოლოდ ფირმებისა და საწარმოების შენარჩუნებას, არამედ მათი განვითარების გეგმასაც ამუშავებენ. როგორც კომპანია Ernst & Young -ის მიერ 200 ევროპული წამყვანი მეწარმის გამოკითხვით გამოირკვა, ბიზნესმენები თავიანთ ქმედითუნარიანობას საკმაოდ ოპტიმისტურად აფასებენ.
Ernst & Young -ის კვლევების მიხედვით, ევროპელ მეწარმეებს სჯერათ არა მხოლოდ იმის, რომ მოახერხებენ მიმდინარე ეკონომიკური კრიზისიდან თავის დროულად დაღწევას, არამედ იმისაც, რომ არსებული ეკონომიკური მდგომარეობა მათი საქმიანობის ზრდის ტემპს დააჩქარებს. აღსანიშნავია, რომ მანამდე "ახალი შესაძლებლობები რთულ სიტუაციაში" ფარგლებში ჩატარებული გამოკითხვების შედეგები იყო გამოქვეყნებული, სადაც ევროპის უმსხვილესი კომპანიების ხელმძღვანელები გამოკითხეს. მიღებული ორი შედეგი ერთმანეთისგან რადიკალურად განსხვავდება. ახალი შედეგები იმას მოწმობენ, რომ საშუალო და მცირე ბიზნესის მფლობელები ცვალებად პირობებთან გაცილებით უკეთ ადაპტირდებიან, ვიდრე ტრანსნაციონალური კომპანიები. რესპოდენტთა 80%-ი ახალ პერსპექტივებს მიმდინარე წლის ბოლომდე ელოდება, ხოლო 16%-ი მთელ ძალებს გადარჩენისკენ მიმართავს.
მონაწილეთა თორმეტმა პროცენტმა უახლოესი 12 თვის განმავლობაში მოქმედებათა მიმართულებების შესახებ განაცხადა, რომ ახალი ბაზრების ათვისებას გეგმავენ, 48% - თავისი ბიზნესის დივერსიფიკაციას, ან საქონლის ახალი მიმართულებების შემუშავებას გეგმავს. გამოკითხულთა ორი მესამედი გაცილებით დიდ ყურადღებას ახალი იდეებისა და ბაზრების ძიებას უთმობს.
აღსანიშნავია, რომ გამოკითხვის მონაწილეებს არ ეშინიათ ფულის ნაკლებობის. ეს საკიხი სულ უფრო სერიოზულ მნიშვნელობას იძენს. გამოკითხულთა ორმოცდაერთმა პროცენტმა განაცხადა, რომ მათ მოკლევადიან დაფინანსებებზე მიუწვდებათ ხელი. ეს კიდევ ერთი დასტურია იმისა, რომ კრიზისისთვის ისინი უკეთ არიან მომზადებულები, ვიდრე ფინანსური გიგანტები.