თუკი ამერიკა სახელმწიფო სესხის ზედა ზღვარს, ანუ, ე.წ. "ჭერს" არ გაზრდის, საპროცენტო განაკვეთები მკვეთრად მოიმატებს, საფონდო ბირჟები კი დაინგრევა. ამის შესახებ საერთაშორისო სავალუტო ფონდის ახალმა დირექტორმა, კრისტინ ლაგარდმა ამერიკულ ტელეარხ ABC–სთვის მიცემულ ინტერვიუში განაცხადა. მისი თქმით, ეს ფონდის მთავარ მიზანს, მსოფლიო ეკონომიკის სტაბილურობას, უდიდეს საშიშროებას შეუქმნის.
ამერიკის ფინანსთა მინისტრმა, ტიმოთი გაიტნერმა აღნიშნა, რომ კონგრესს 2011 წლის 2 აგვისტომდე, სახელმწიფო ვალის ზედა ზღვარის აწევის ალტერნატივა არ აქვს.
ცნობილია, რომ უახლოესი 10 წლის მანძილზე, ბიუჯეტის დეფიციტის შეკვეცის თაობაზე რესპუბლიკელებსა და დემოკრატებს შორის უწყვეტი მოლაპარაკებები მიმდინარეობს. ორივე მხარეს მშვენივრად ესმის, რომ თუკი თეთრი სახლი და რესპუბლიკელები კომპრომისზე შეთანხმდებიან, სახელმწიფო დავალიანების (რამაც უკვე 14,3 ტრილიონ დოლარს მიაღწია) ლიმიტის გაზრდა დამტკიცდება.
ობამას ადმინისტრაციას 10 წლის განმავლობაში ბიუჯეტის დეფიციტის შემცირება 4 ტრილიონ დოლარამდე სურს, მაგრამ თეთრ სახლში თვლიან, რომ ეს შეკვეცა მიღწეულ უნდა იქნას ფედერალური ხარჯების შემცირებისა და გადასახადების გაზრდის ხარჯზე. რესპუბლიკელები კი მხოლოდ ისეთი ძვირადღირებული სოციალური პროგრამების სახელმწიფო დაფინანსების შეზღუდვას ცდილობენ, როგორიცაა Medicare და Medicaid.
რეგისტრაცია!
