აზერბაიჯანის მინისტრთა კაბინეტმა იმპორტირებულ ხორბლეულსა და ჭვავზე, ასევე ფქვილზე დღგ-ის გადასახადის შემოღებაზე მიიღო გადაწყვეტილება.
ამის შესახებ ინფორმაციას აზერბაიჯანული სააგენტო თრენდ.აზ ავრცელებს. სააგენტო აზერბაიჯანის სოფლის მეურნეობის სამინისტროს წარმომადგენელზე საბირ ველიევზე დაყრდნობით ავრცელებს ინფორმაციას, რომ მინისტრთა კაბინეტის მიერ მიღებული გადაწყვეტილება პურისა და ფქვილის ფასზე გავლენას არ მოახდენს.
აზერბაიჯანის მინისტრთა კაბინეტმა აღნიშნული პროდუქციის იმპორტი დღგ-ის 18%-იანი განაკვეთისგან 2010 წლის დეკემბერში გაათავისუფლა.
ველიევის თქმით, დღგ-გან გათავისუფლების საკითხი მაშინ დადგა დღის წესრიგში, რაც შარშან მოსავალი ცუდი კლიმატის გამო მცირე იყო და საჭირო იყო მეტი რაოდენობით იმპორტირებული პროდუქციის შეტანა.
ამ გადაწყვეტილებით აზერბაიჯანის მთავრობა აღნიშნულ პროდუქციაზე ფასების შენარჩუნებასაც შეეცადა.
ველიევის თქმით, 2010 წელს აზერბაიჯანში 2,1 მლნ ტონა ხორბალია წარმოებული, 1,4 მლნ ტონა ხორბალი კი ქვეყანაში იმპორტირებულია, ამ მთლიანი რაოდენობიდან 1 მლნ ტონა ხორბალი ქვეყანას არ გამოუყენებია და იგი მარაგების სახით დარჩა.
~წელს ხორბლეულსა და მარცვლეულ კულტურებზე დეფიციტი არ შეინიშნება და მარაგების მოცულობაც საკმარისია”, - განაცხადა ველიევმა და დასძინა, შესაბამისად, აღნიშნული პროდუქცია შესაძლოა ძველ დასაბეგრ ბაზას დაუბრუნდეს.
აზერბაიჯანი ხორბლის იმპორტს ამ დროისთვის რუსეთიდან და ყაზახეთიდან ახორციელებს.
მიმდინარე წელს აზერბაიჯანში 2,5 მლნ ტონა ხორბლის წარმოებას გეგმავენ, რაც 500 ათასი ტონით მეტია გასულ წელთან შედარებით.
რეგისტრაცია!
