ნანახია: 332

გასულ ხუთშაბათს ჟურნალისტებთან საუბრისას ფედერალური სარეზერვო სისტემის თავმჯდომარემ - ბენ ბერნანკემ, მოუწოდა რესპუბლიკური პარტიის წარმომადგენლებს, რომ ყოველგვარი შეფერხების გარეშე გაზარდონ სახელმწიფო სესხების დასაშვები მაქსიმუმი. აშშ-ს მთავარი ბანკირი პოლიტიკოსებს აფრთხილებს, რომ დაყოვნების შემთხვევაში მოსალოდნელია ქვეყნის სახელმწიფო ობლიგაციების დეფოლტი და ახალი ეკონომიკური საფრთხეები.
"გარკვეული მომენტის შემდეგ აშშ იძულებული გახდება დაუშვას საკუთარი ვალის დეფოლტი. ასეთი მოვლენის გავლენა ფინანსურ სისტემებზე, საბიუჯეტო-საკრედიტო პოლიტიკაზე და ეკონომიკაზე კატასტროფული იქნება", - განაცხადა ბენ ბერნანკემ, ფედერალური სარეზერვო სისტემის თავმჯდომარემ.
ასეთი არგუმენტი გამოიყენა ბერნანკემ იმისთვის, რომ რესპუბლიკური პარტიის წევრებმა რაც შეიძლება სწრაფად გაზარდონ სახელმწიფო სესხების დასაშვები მაქსიმუმი და პოლიტიკური თამაში არ ითამაშონ თავიანთ ოპონენტ დემოკრატებთან ამ საკითხთან დაკავშირებით.
დღეისათვის ვალებზე ეს ზღვარი დადგენილი კანონის მიხედვით 14.3 ტრილიონი დოლარია. ამასთან, ამერიკის ხელისუფლების ვალებმა უკვე მიაღწიეს მოცემულ მაჩვენებელს. თუ ეს შეზღუდვა არ შეიცვლება, აშშ-ს ფინანსთა სამინისტრო ვეღარ მოახერხებს ობლიგაციების გამოშვებას, რაც ძალიან მნიშვნელოვანია სახელმწიფო ბიუჯეტის დეფიციტის აღმოსაფხვრელად.
არსებობს საფრთხე, რომ ამ ზღვრის გაზრდის წინააღმდეგ შესაძლებელია ხმა მისცენ უმრავლესობაში მყოფმა რესპუბლიკელებმა, რათა განახორციელონ საკუთარი ინიციატივები. კერძოდ, ისინი სთავაზობდნენ მთავრობას, რომ სახელმწიფო ვალის ლიმიტის გაზრდამდე ერთჯერადად შეემცირებინათ სახელმწიფო ხარჯები, რამაც გამოიწვია პროტესტი დემოკრატების მხრიდან.