ნანახია: 947

აშშ-ში დაკავებული სომხური მაფიის წევრების სახელები გამოაქვეყნეს. როგორც გაზეთი “ჟამანაკი” გადმოგვცემს, მათ შორის იყო პოგოს სატამიანი, რომელიც ერევანში, ოპერის თეატრთან არსებული კაფე “ატლანტიკის” მეწილეა. ამავე კაფის მეორე მეწილე კი, სომხეთის პოლიციის სამართველოს მაღალჩინოსანი, არსენ კაზარიანია.
სატამიანმა აშშ-ში სომეხი მომღერლის, ტატას ბოლო კონცერტის ორგანიზება მოახდინა, წერს გაზეთი და ამატებს, რომ პოგოსი ერევნის პოლიცმეისტერის ნერსიკ ნაზარიანის შვილის ქორწილში იღებდა მონაწილეობას.
13 ოქტომბერს, დილით ადრე, ნიუ-იორკსა და ლოს ანჯელესში 70-ზე მეტი კრიმინალური სამყაროს წევრი დააპატიმრეს. მათი უმეტესობა სომეხი იმიგრანტებისა და სომეხი მოქალაქეებისაგან შეადგება. ისინი ბრალდებულნი არიან ათასობით ექიმისა და პაციენტის პირადი მონაცემების მოპარვაში, რომლებსაც მძარცველები “მედიკარის” სისტემიდან მილიონობით დოლარის ამოსაღებად იყენებდნენ. “მედიკარი” მოხუცებულთა სამედიცინო დახმარების ცენტრს წარმოადგენს. ამის შესახებ პრეს-კონფერენციაზე, ნიუ-იორკის ფედერალურმა პროკურორმა პრიტ ბახრარამ განაცხადა. ამას გარდა, ბრალდება ოჰაიოს, ნიუ-მექსიკოსა და ჯორჯიას შტატის ეჭვმიტანილებსაც წაეყენათ.
ამერიკული ინტერნეტ-რესურსის KRQE -ს ინფორმაციით, დაჯგუფებაში შედიოდნენ ასევე, რამდენიმე რუსი, უკრაინელი და ყაზახი მოქალაქეები. ესენი არიან: იგორ ოსტრონინი (22 წლის, უკრაინელი), სერგეი ივანოვი (25 წლის, რუსი), ევგენი გრინევი (24 წლის, რუსი), ტატიანა ბოლშაკოვა (22 წლის, რუსი) და არტურ ნაბიევი (23 წლის ყაზახი). როგორც KRQE იტყობინება, ამ ამბის გამო 73 ადამიანის საქმე იხილება, მათ შორის 52 შაბათს, 13 ოქტომბერს დააკავეს.
გამოძიების თანახმად, სომხური მაფიის ლიდერი, “კანონიერი ქურდი” არმენ კაზარიანი, მეტსახელად “პზო” იყო. როგორც ინტერნეტ-პორტალი “კრიმინალნაია რასია” აცხადებს, ოპერატიული მონაცემებით, ორგანიზებული კრიმინალური დაჯგუფება, რომლის ლიდერიც “პზო” გახლავთ, აწარმოებდა იარაღის, ძვრიფასი ქვების და იშვიათი მეტალების უკანონო ვაჭრობას, ასევე ნარკოტიკის კონტრაბანდას და ადამიანთა გატაცებებს.
ფედერალური პროკურატურის მონაცემებით, ეჭვმიტანილებმა, მოხუცებულთა სამედიცინო დახმარების პროგრამის, “მედიკარის” ისტორიაში უმსხვილესი თაღლითური სქემა შეიმუშავეს. მათ მიერ მოპარული სახელებისა და მონაცემების გამოყენებით, დაჯგუფებამ აშშ-ს 25 შტატში 118 ფიქტიური სამედიცინო კლინიკა გახსნა. ისინი სამედიცინო დახმარების გაწევისთვის დაზარალებულებს თანხას “მედიკარის” ანგარიშზე ახდევინებდნენ. რა თქმა უნდა სამედიცინო დახმარება არც არავის აღმოუჩენია და არც არავის მიუღია.
ფედერალურმა პროკურორმა ბახრარამ მხილებულ ყაჩაღურ დაჯგუფებას “საერთაშორისო” უწოდა და ხაზი გაუსვა, რომ მათ ხელმძღვანელებს მჭიდრო კავშირები ქონდათ სომხეთთან, ისინი რეგულარულად ახდენდენ ამ ქვეყანაში ვიზიტს და აშშ-ში მოპოვებული თაღლითური ფულით უძრავ ქონებას იძენდენ. ბახრარამ ეს დაჯგუფება “კლასიკურ Cosa Nostra”-ს შეადარა და დაამატა, რომ “არალეგალური შემოსავლების ოდენობით, გეოგრაფიული სიდიდისა და ამბიციურობის მხრივ, ამ სომხურ-ამერიკული დაჯგიფების, ტრადიციულ მაფიასაც კი შეშურდებოდა”.
15 ოქტომბერს, სომხეთის პროკურატურამ განაცხადა, რომ მზად არიან მაფიოზური დაჯგუფების მოღვაწეობის გახსნის საკითხში, თავის ამერიკელ კოლეგებთან ითანამშრომლონ. ამასთან, სომხეთის გენერალური პროკურორის პრეს-მდივანმა სონა ტრუზიანმა განმარტა, რომ სომხეთის გენერალურ პროკურატურას აშშ-ს სამართალდამცავი ორგანოებისგან, სომხური მაფიისა და მათი ქმედებების შესახებ არანაირი ოფიციალური ინფორმაცია არ მიუღია. მათ ამის შესახებ მედიით შეიტყვეს.

დიმიტრი ლელაძე