ქართული ცხვრის საექსპორტო გეოგრაფია ფართოვდება.
სურსათის ეროვნული სააგენტოს ძალისხმევით, 2200 სული ცხვარი ექსპორტზე ისრაელში პირველად გადის.
სააგენტოს ცნობით, ისრაელის მხარესთან მოლაპარაკებები 2011 წლის თებერვლიდან მიმდინარეობდა და მათთვის მისაღები აღმოჩნდა საქართველოში არსებული ეპიზოოტიური მდგომარეობა, რაც სააგენტოს მიერ ცხოველებში პროფილაქტიკის მიზნით ჩატარებული იმუნიზაციის შედეგია.
საქმე ეხება "ეპიზოოტიის საწინააღმდეგო სახელმწიფო მიზნობრივი პროგრამას", რომლის ფარგლებში სამცხე-ჯავახეთის რეგიონში 25 ათასი სული ცხვარი აიცრა. იმუნიზაციის პარალელურად პირველად განხორციელდა საქონლის იდენტიფიკაცია, რომელმაც ხელი შეუწყო ექსპორტის პოტენციალის გაზრდას და ისრაელის მხარემ კომპანია "ედენ ინტერნეიშენალ თრეიდინგს" ქვეყანაში ცოცხალი ცხვრის ექსპორტის ნება დართო.
როგორც სააგენტოს ხელმძღვანელი დავით კობერიძე ამბობს, მნიშვნელოვანია, რომ ქართულმხა მხარემ ყველა მოთხოვნა დააკმაყოფილა და სოფლის მეურნეობის სამინისტროსა და სურსათის ეროვნული სააგენტოს ძალისხმევით ეს სავაჭრო ურთიერთობა შედგა, რაც მომავალში კიდევ უფრო გაღრმავდება.
მიმდინარე წელს სულ ექსპორტზე 101 777 სული ცხვარი აზერბაიჯანში, სომხეთში, ირანში, ლიბიაში, იორდანიაში, დუბაიში, ქუვეითში, ყატარში, სირიაში, ეგვიპტესა და არაბეთში გავიდა.
რეგისტრაცია!
