ნანახია: 343

ოლღა ბებიასი არ იყოს, სად ნახა მაგ შეჩვენებულმა ქართული აგროპროდუქცია? თუ მიხო სვიმონიშვილის მიერ მოხარშულ ორიოდ ქილა მურაბას და `პავიდლოს~ არ მივიღებთ მხედველობაში, აგრარულ სექტორში აღარაფერი იქმნება. ჩვენ გვახსოვს მოსინგაპურეთა დევიზი - აგრარული სექტორი ჩამორჩენილობის მაჩვენებელია (ბენდუქიძე, ბოკერია და სხვანი).
და აი, ერთ მშვენიერ დღეს, სოფლის მეურნეობის მინისტრმა, ღირსების ორდენის კავალერმა, ბაკურ კვეზერელმა მოსახლეობას ქართული პროდუქციის მხარდაჭერისკენ მოუწოდა.
როგორც იქნა, ბატონი კვეზერელი 19 ივლისს ყოფილი დეზერტირების ბაზარის ნანგრევებს ესტუმრა. იქ, ჭუჭყსა და ტალახში ჩაყრილი მოვაჭრეების წინაშე ყინჩი გამოსვლისას, მან განაცხადა, რომ ქართველი გლეხისგან თითო კილოგრამი ხილისა თუ ბოსტნეულის შეძენით, გლეხებს პროდუქციის რეალიზაციასა და სოფლის მეურნეობის განვითარებაში ვეხმარებითო(?!). ბატონ მინისტრს, ეტყობა ჯერ-ჯერობით არ მოუმზადებია საკურსო ნაშრომი იმის თაობაზე, რომ სოფლის მეურნეობა გლეხებმა კი არ უნდა განავითარონ, არამედ მთავრობამ, გლეხმა და ფერმერმა პროდუქცია უნდა მოიყვანოს, მთავრობამ კი მას ამაში ხელი არ უნდა შეუშალოს, ხოლო ქართული მიწები ბურებს, ინდოელებს და ჩინელებს არ უნდა მიჰყიდოს.
~მოსახლეობას სოლიდარობის აქციისკენ მოვუწოდებ და ვურჩევ მოიხმარონ ქართული სოფლის მეურნეობის პროდუქტები, რითაც გლეხობას, ვინც სოფლად არის დასაქმებული, ვეხმარებით. მით უმეტეს, რომ ქართული პროდუქტი ყველაზე ჯანმრთელი პროდუქტია,” - განაცხადა მინისტრმა.
იგი, ჩანს, მართლაც პირველად იყო ბაზარში, თორემ ჩვენი მოქალაქეები პირველი, რასაც კარტოფილის გამყიდველს ეკითხებიან ესაა - ქართულია თუ თურქული? და ქართულს ამჯობინებენ, კვეზერელის ყოველგვარი ბრძნული რჩევის გარეშე.