"აგრარული მთავრობა” უცხოელებს უფრო სწყალობს, ვიდრე ქართველებს » ბანკები და ფინანსები

"აგრარული მთავრობა” უცხოელებს უფრო სწყალობს, ვიდრე ქართველებს

მთავარიეკონომიკა 14.04.2011

"აგრარული მთავრობა” უცხოელებს უფრო სწყალობს, ვიდრე ქართველებსბოლო ერთი წლის განმავლობაში უძრავი ქონების ბაზარზე ყველაზე დიდი მოთხოვნა მიწის ნაკვეთებზეა. გაიყიდა 21 მილიონი ლარის უძრავი ქონება, რაც უპრეცედენტო მაჩვენებელია. თბილისის მერიის ქონების სააგენტოს ხელმძღვანელის ვალერი გვათუას განცხადებით, დადებითი მაჩვენებელი ნაწილობრივ იმ რეფორმის შედეგია, რომელიც სააგენტოში განხორციელდა. 2011 წლის დასაწყისში შეიცვალა მიწის ნორმატიული ფასები, ახალი ტენდენციები ასევე ნორმატიულ რუკაზეც აისახა. გაუქმდა კომისია, რომელიც მიწის ნაკვეთებზე სააუქციონო ფასის დასადგენად აუცილებელი ბიუროკრატიული ელემენტი იყო. დღეს არსებობს ფორმულა, რომლის მიხედვითაც მიწის ნაკვეთი დაანგარიშებული ფასით გადის აუქციონზე. თუ მიწის ნაკვეთზე მოთხოვნა და კონკურენცია მატულობს, მაშინ მზარდი მოთხოვნის ფონზე ნორმატიული ფასებიც თავიდან განიხილება და შესაძლებელია დადგენილი ფასიც გაზარდოს. რა თქმა უნდა, ნორმატიულ რუკაზე აუცილებლად აისახება ის ტენდენციები, რაც უძრავი ქონების ბაზარზე მიმდინარეობს.
ქონების მართვის სააგენტოს განცხადებით, მოთხოვნა გარეუბნებში შედარებით მაღალია, ვიდრე ცენტრალურ ნაწილებში, მაგალითად: გაყიდვები ისანი-სამგორის და გლდანი-ნაძალადევის რაიონებში უფრო მაღალია, ვიდრე ვაკე-საბურთალოს რაიონებში. საინვესტიციო მიწის ნაკვეთებს და შენობა-ნაგებობებს, ცენტრშიც და გარეუბნებშიც კომპანიები ძირითადად კომერციული საქმიანობის დასაწყებად ყიდულობენ, რაც ეკონომიკური ზრდის ინდიკატორიც არის.
მას შემდეგ რაც სურსათის დეფიციტის პრობლემა გაჩნდა საქართველოში სასოფლო-სამეურნეო მიწებზე მოთხოვნა ბოლო დროს უცხოელი ინვესტორების მხრიდან ძალიან გაიზარდა, ეს ბუნებრივიცაა, რადგან უცხოელი ინვესტორებისთვის ჩვენი კანონმდებლობა გაცილებით ლიბერალურია, ვიდრე ადგილობრივ მეწარმეებთან, რომელთა საქმიანობაშიც სახელმწიფო ხშირად უხეშად ერევა.
კახეთში მიწებს მასიურად შესყიდვა დაიწყეს ინდუსმა და ბულგარელმა ინვესტორებმა. სპეციალისტების განცხადებით, მათ აქტიურობას დაბალი ფასი, კლიმატი და ბიზნესგარემო განსაზღვრავს. ასევე დიდია დაინტერესება ჩინელი ინვესტორების მხრიდანაც. საქართველოს ეკონომიკის მინისტრის მოადგილე არჩილ კეკელია შეხვდა ჩინელ ინვესტორებს და უპასუხა მათ კითხვებს ენერგეტიკის, ფარმაციის და კომუნიკაციის სფეროსთან დაკავშირებით. როგორც ჩანს, ჩინელი ინვესტორებიც აპირებენ საქართველოში კაპიტალის დაბანდებას. სავარაუდო პროექტების ჯამური ღირებულება რამოდენიმე ასეული მილიონი ლარია, ხოლო ჩინეთის მთავრობის მიერ დამტკიცებული შემდეგი ხუთწლედი, პრიორიტეტულ სფეროებში ითვალისწინებს ქვეყნის ეკონომიკაში დაახლოებით ნახევარი ტრილიონი დოლარის ჩადებას, რაც ჩვენი ქვეყნის ეკონომიკისთვის ძალიან მნიშვნელოანია.
ამგვარად, საქართველოში ყველანაირი პირობა იქმნება უცხოელი ინვესტორებისთვის, იმისათვის, რომ მათ თავისუფლად წამოიწყონ ბიზნესი, მაგრამ ადგილობრივი მეწარმეებისთვის არანაირი ხელიშეწყობა არ ხდება. პირიქით, ხელისუფლების მხრიდან მკაცრი ადმინისტრირება მეწარმეს ხელს უშლის და ყოველგვარ სურვილს აკარგვინებს ბიზნესის დაწყებაში.

რუსუდან გაბესკირია


{custom category="2,4,5,15" template="shortstory_2" aviable="global" from="0" limit="10" cache="no"}