ნანახია: 487

მსოფლიოს წამყვან ქვეყნებს ფინანსური კრიზისი ისევ მწვავედ უტევს. განსაკუთრებით მძიმე სიტუაციაა უძრავი ქონების ბაზრებზე. რამდენიმე კვირის წინ, გავრცელდა ინფორმაცია, რომ აშშ-ში ბინის შეძენა 10 000 დოლარად არის შესაძლებელი. მაშინ ეს ინფორმაცია საქართველოს კონტექსტში არავის გაუაზრებია.

თუმცა, ჩვენთვის უფრო მრავლისმეტყველი შეიძლება აღმოჩნდეს აღმოსავლეთ ევროპის ერთ-ერთი წარმატებული და ევროკავშირის წევრი ქვეყნის ბულგარეთის უძრავი ქონების ბაზრის მდგრომარეობა. ფინანსური კრიზისის გამო, უძრავი ქონება ისე გაუფასურდა, რომ ბულგარეთის სანაპიროებზე ბინები 20-30 ათას დოლარად იყიდება. ჯერ კიდევ 3 წლის წინ, ანალოგიური სახლები 150-200 ათასი დოლარი ღირდა, მაგრამ დღეს მათი ფასი 50 ათას დოლარს იშვიათად აღემატება. 2011 წელს, რეგიონში მიწაზე მოთხოვნა მნიშვნელოვნად დაეცა და 1 კვ/მიწის ფასმა 15-20 ევრო შეადგინა.

როგორც ვიცით, ბულგარეთის ეკონომიკა მნიშვნელოვანწილად ტურიზმზეა ორიენტიერებული, ამ ფონზე, საქართველოში კარგად უნდა გაიაზრონ იქ შექმნილი მდგომარეობა. საქმე ისაა, რომ საქართველოს დღევანდელი ხელისუფლება ტურიზმს ეკონომიკის მთავარ ორიენტირად მოიაზრებს, ყველაზე მსხვილი პროექტები კი ტურიზმის ინფრასტრუქტურის მოწყობის მიზნით ხორციელდება. რეალურად კი, როგორც ბულგარეთის მაგალითი გვიჩვენებს, ტურიზმი არ არის ის სფერო, რომელზეც ამხელა ფსონის დადება შეიძლება და მთელი სახელმწიფო ხარჯების მასზე გაწევა. მოკლევადიან პერსპექტივაში, საქართველოს უმაღლესი ხელისუფლების წარმომადგენელთა განცხადებებს ჩვენთან გარკვეული შედეგი აქვს, - სანაპირო ზოლში უძრავ ქონებაზე გარკვეული ზრდის მოლოდინი არსებობს, რაც თავის მხრივ, განაპირობებს უძრავ ქონებაზე ფასების შენარჩუნებას. მაგრამ ისიც ფაქტია, რომ ეს პოლიტიკა დღეგრძელი ობიექტურად ვერ იქნება. ბულგარეთი და საქართველო ერთიან ტურისტულ რეგიონად მოიაზრება, შესაბამისად, ფასები აუცილებლად დაიწყებს გათანაბრებას. იმ ფონზე, როცა ევროკავშირის წევრ ქვეყანაში უძრავი ქონება ასე იაფია, ძნელი წარმოსადგენია ინვესტიციები ჯერ კიდევ საკმაოდ ძვირ საქართველოში წამოვიდეს. გარდა ამისა, შავი ზღვის აუზის კიდევ ერთი ქვეყნის მაგალითი ცხადყოფს, რომ ტურიზმი, ობიექტურად არ შეიძლება იყოს ქვეყნის ეკონომიკის ლოკომოტივი.