ნანახია: 668

ხელოვნების ერთ-ერთ დარგში, რომელიც საქართველოში შეიძლება ყველაზე პერსპექტიულად ჩაითვალოს, დაუფინანსებლობის გამო, პრაქტიკულად, არაფერი კეთდება. საუბარია ქართულ მულტიპლიკაციაზე. ბოლო სერიოზული მულტიპლიკაციური ნამუშევარი "გავარდნილები" გახლავთ, რომელიც ერთი წლის წინ დავით სიხარულიძემ გადაიღო. სასაცილოა ის თანხა, რომელიც ამ სამგანზომილებიანი მულტფილმის დასაფინანსებლად კინოცენტრმა გამოყო. საუბარია 30 000 ლარზე, რომელიც მიზერული ციფრია ასეთი დონის ანიმაციის გასაკეთებლად. რეჟისორის განცხადებით ფილმი საკუთარი ტექნიკური ბაზისა და რამდენიმე ადამიანის კეთილი ნებით შეიქმნა. "რაღაც ფონდი გაიხსნა ქართული კინოს და ანიმაციის განვითარების, მაგრამ ეს იმდენად მცირეა, რომ ამაზე საუბარიც კი არასერიოზულია ", _ ამბობს დავით სიხარულიძე.
ინვესტიციები ამ სფეროში საერთოდ არ იდება და რეჟისორ-ანიმატორების აზრით, მდგომარეობის გამოსასწორებლად რაიმე უნდა გაკეთდეს. მხოლოდ კეთილი ნებისა და თავად მულტიპლიკატორების ხარჯზე, ის ვერ იარსებებს.
საქართველოს ეროვნული კინემატოგრაფის ცენტრში აცხადებენ, რომ წინა წლებთან შედარებით მდგომარეობა გაუმჯობესდა. მაგალითად, ბოლოს ერთი წლის წინ დაფინანსებული "გავარდნილები" მოჰყავთ.
კულტურის სამინისტროს კი, როგორც ჩანს, მულტფილმების დაფინანსება საერთოდ არ ეხება.
გაურკვეველია, ვინ უნდა ზრუნავდეს ამ დარგის განვითარებაზე. მაშინ, როდესაც სწორედ მულტიპლიკაციას გაცილებით მეტი შანსი აქვს მსოფლიო დონეს გაუთანაბრდეს, ვიდრე ქართულ კინოს.

დაკო შონია