საკაბელო ტელევიზია, რომელიც მაესტროს არ ბლოკავს, მომხმარებელთა დაკარგვის საფრთხის წინაშე დგას
„სუპერ ტივის“ მომხმარებელს, რომელსაც GMG-ს არხების ყურება სურს, სხვა საკაბელო ტელევიზიებზე გადასვლა მოუწევს. ამის შესახებ GMG-ს ერთ-ერთი დამფუძნებელი მამუკა გამყრელიძე აცხადებს.
პირველი სექტემბრიდან GMG-ის არხები „სუპერ ტივის“ - ყოფილი „აიეტის“ ეთერიდან გათიშულია და ისინი არაპოპულარული უცხოური ტელეარხებით ჩანაცვლდა. ამას გამყრელიძე იმით ხსნის, რომ მესამე თვეა, „სუპერტივის“ წარმომადგენლებს ხელშეკრულებით დაკისრებული თანხა არ გადაუხდიათ. „ვიდრე მათთან ხელშეკრულებას გავაფორმებდით, გაგვაფრთხილეს, ცუდი გადამხდელები არიანო. სხვათა შორის, „სუპერ ტივის“ სხვა ტელეკომპანიებიც ედავებიან,“ - აცხადებს მამუკა გამყრელიძე.
მისი თქმით, GMG-მ რამდენიმე საკაბელო ტელეკომპანიასთან - მათ შორის „კავკასუს ინლაინთან“ და „გლობალთან“ ხელშეკრულებები უკვე გააფორმა და ისინი, ვისაც GMG-ს არხების მიღება სურს, ამ საკაბელო ტელეკომპანიების მომხმარებლები უნდა გახდნენ. ამასთან, მამუკა გამყრელიძის თქმით, თუ „სუპერ ტივი“ დაფარავს დავალიანებას და დროულად გადაიხდის მომდევნო თვეების გადასახადსაც, თანამშრომლობა ჩვეულ რეჟიმში გაგრძელდება.
თუმცა „სუპერ ტივის“ იურისტის სოფიო ნემსაძის განცხადებით, ისინი კონტრაქტის გაგრძელებას აღარ აპირებენ. ხელშეკრულების გაწყვეტის მიზეზად კი GMG-ის მიერ დაწესებულ მაღალ გადასახადს ასახელებენ. დაბრუნდება თუ არა „სუპერ ტივის“ ეთერში „ენ ტე ვე ფეხბურთი,“ ამ კითხვაზე ნემსაძეს ჯერჯერობით პასუხი არ აქვს.
„ყველა სიახლე“
რეგისტრაცია!
