"ევრაზიანსთილი” თურმე პროფკავშირელ აქტივისტებს სამსახურიდან ათავისუფლებს. ამან აღაშფოთა პროფკავშირები. იქ პირველად გაიგეს, რომ ამდაგვარი პრინციპის საწარმოებში ზოგჯერ უცხოელ მუშებს გაცილებით მაღალი ხელფასები აქვთ, ვიდრე საქართველოს მოქალაქეებს. პროფკავშირები მათ მიმართ საზოგადოების კრიტიკის შემდეგ გააქტიურებას ცდილობენ.
საქართველოს პროფესიული კავშირების გაერთიანების ოფისში დღეს შ.პ.ს. „ევრაზიანსთილსის“ გათავისუფლებული თანამშრომლები, საგაფიცვო კომიტეტის წარმომადგენლები, ქარხნის პირველადი პროფკავშირული ორგანიზაციის, მეტალურგიული, სამთო და ქიმიური მრეწველობის მუშაკთა პროფკავშირის, საქართველოს პროფკავშირების გაერთიანების ხელმძღვანელები სამოქალაქო საზოგადოების წარმომადგენლებს შეხვდნენ.
როგორც "მედიანიუსს" გაერთიანებული პროფკავშირებიდან აცნობეს, შეხვედრის თემა იყო საქართველოში პროფკავშირული მოძრაობის წინააღმდეგ წარმოებული ბრძოლა; დისკრიმინაციული დამოკიდებულება პროფკავშირელი აქტივისტებისადმი; „ევრაზიანსთისლში“ მიმდინარე პროცესები და საგაფიცვო ღონისძიებები; პროფკავშირების სხვადასხვა სექტორში, რკინიგზაში, განათლებაში, სხვა დარგებში, შექმნილი ვითარება.
პროფკავშირების ხელმძღვანელებმა არასამთავრობო ორგანიზაციების წარმომადგენლებს გააცნეს დეტალური ინფორმაცია მათთვის საინტერესო ყველა საკითხთან დაკავშირებით. სტუმრების განსაკუთრებული ინტერესი გამოიწვია ქარხანაში დასაქმებულთა შრომის პირობებმა; ამასთან დაკავშირებით, სამმხრივი სახელმწიფო კომისიისა და მთავრობის რეაგირებამ; გაფიცვის დეტალებმა; პროფკავშირის წევრების დისკრიმინაციის ფაქტებმა; სამსახურიდან უკანონოდ გათავისუფლებული ადამიანების საქმეების განხილვამ სასამართლო ხელისუფლების მიერ; პროფკავშირების წინააღმდეგ გაშლილმა კამპანიამ.
არასამთავრობო ორგანიზაციებმა გამოხატეს მხარდაჭერა პროფკავშირების მიერ სოციალური სამართლიანობის დამკვიდრებისთვის წარმოებული ბრძოლისადმი და „ევრაზიანსთილსის“ გათავისუფლებულ თანამშრომლებს თანადგომა აღუთქვეს.
შეხვედრაში მონაწილეობა მიიღეს: საქართველოს პროფესიული კავშირების გაერთიანებამ, საქართველოს ახალგაზრდა იურისტთა ასოციაციამ, CENN–მა, ფრიდრიხ ებერტის ფონდმა საქართველოში, „საზოგადოების კვლევის ცენტრმა“, სახალხო მოძრაობამ „მრავალეროვანი საქართველო“, ორგანიზაციამ „საქართველო 21–ე საუკუნე“, ახალგაზრდა სოციალისტებმა.
”მედიანიუსის” მიხედვით
რეგისტრაცია!
