საქართველოს სტატისტიკის ეროვნული სამსახურის „საქსტატი" სამუშაო ჯგუფი აღმასრულებელი დირექტორის ზაზა ჭელიძის ხელმძღვანელობით შვედეთში იმყოფება.
„საქსტატის" ცნობით, ვიზიტის მიზანია, „საქსტატსა" და შვედეთის სტატისტიკას შორის 3-წლიანი თანამშრომლობის პროექტის სამუშაო გეგმის შეთანხმება.
მიმდინარე წლის ივნისში „საქსტატსა და შვედეთის მხარეს შორის გაფორმებული ხელშეკრულების საფუძველზე, შვედეთის სტატისტიკა „საქსტატს" დახმარებას გაუწევს მეთოდოლოგიის, თანამშრომელთა ტრენინგის, ინფლაციის, მთლიანი შიდა პროდუქტის და სხვა ძირითადი სტატისტიკური კვლევების ხარისიხის გაუმჯობესების მიმართულებით.
„საქსტატში" უკვე მუშაობა დაიწყო შვედეთის სტატისტიკის მუდმივმა წარმომადგენელმა, სექტემბრის დასაწყისში კი „საქსტატს" ეწვევა შვედეთის სტატისტიკის პირველი სამუშაო მისია, რომელიც ინფლაციის და მთლიანად, ფასების სტატისტიკის მეთოდოლოგიის მიმართულებით იმუშავებს.
პროექტის მთლიანი ბიუჯეტი 4 მლნ ლარს შეადგენს. პროექტს შვედეთის საერთაშორისო განვითარების სააგენტო (SIDA) აფინანსებს.
რეგისტრაცია!
