ნანახია: 468

თბილისის საქალაქო სასამართლომ 2011 წლის10 აგვისტოს განჩინებით გამომცემლობა „სამშობლოს" გაკოტრების პროცესი დაიწყო.
გამომცემლობის მეურვედ აღსრულების ეროვნული ბიურო დაინიშნა, რომელიც განჩინების თანახმად, ვალდებულია შეინახოს სამეურვეო ქონება და დაიცვას იგი დაზიანებისა და განადგურებისაგან.

სასამართლო განჩინების თანახმად, გამომცემლობა „სამშობლოს" მეურვის თანხმობის გარეშე გარიგების დადება ან დადებული გარიგების შეწყვეტა ეკრძალება. ამასთანავე, გამომცემლობა ვალდებულია აღსრულების ეროვნულ ბიუროს მოვალის ქონების, ვალდებულებების, ფინანსური მდგომარეობისა და საქმიანობის შესახებ ანგარიში განცხადების წარმოებაში მიღებიდან 30 დღის განმავლობაში წარუდგინოს. წინაღმდეგ შემთხვევაში მის წინააღმდეგ სისხლის სამართლის საქმე აღიძრება.

კრედიტორთა პირველი კრება თბილისის საქალაქო სასამართლოს შენობაში 2011 წლის 30 სექტემბერს, 11:00 საათზე გაიმართება.