ინტერპრესნიუსი სამარშრუტო ტაქსებით მგზავრობის ღირებულების გაიაფების მოთხოვნით, საინიციატივო ჯგუფი პრეზიდენტს, თბილისის მერსა და საკრებულოს მიმართავს.
გუშინ პარლამენტის შენობის წინ გამართული საპროტესტო აქციის ორგანიზატორმა ბექა კემულარიამ რამდენიმე მოქალაქესთან ერთად, დღეს საკრებულოში გუშინდელი აქციის რეზოლუციის ტექსტი შეიტანა და განაცხადის სახით საკრებულოს მოქალაქეთა მისაღებში დატოვეს.
როგორც ჟურნალისტებთან საუბრისას ბექა კემულარიამ განაცხადა, ისინი ამ რეზოლუციით ითხოვენ ხელისუფლების მხრიდან გაზიარებული იყოს მათი, როგორც მომხმარებლის ინტერესები და სამარშრუტო ტაქსებზე კომპანია "თბილისის მიკროავტობუსის" მიერ თვითნებურად გაზრდილი მგზავრობის ღირებულება დაუბრუნდეს 15 ივლისამდე არსებულ მდგომარეობას, შეწყდეს ზეწოლა სამარშრუტო ტაქსების მძღოლებზე ხელისუფლების მხრიდან, კომპანია "თბილისის მიკროავტობუსს" დაევალოს ტენდერის პირობების თანახმად, შეცვალოს ძველი მიკროავტობუსები ახლით, ამისთვის კი, კომპანიამ განახორციელოს ინვესტიცია და ახალი მიკროავტობუსების ფული მოსახლეობიდან არ ამოიღოს. ეს განხორციელდეს მგზავრობის ღირებულების 50 თეთრზე შენარჩუნების პირობებში, წინააღმდეგ შემთხვევაში, გაუქმდეს კომპანიის გამოსავლენად ჩატარებული ტენდერის შედეგები და ჩატარდეს ახალი.
რეგისტრაცია!
