ნანახია: 359

ჩხოროწყუს რაიონის სოფელ მუხურში მდებარე კურორტ "ლუგელას" ამინდმა დამსვენებელი დაუკარგა. თუმცა, სოფელში იმედოვნებენ, რომ აგვისტო–სექტემბერში კლიენტების რაოდენობა პიკს მიაღწევს.
"მიუხედავად იმისა, რომ კურორტი ერთ პატარა სოფელს მოიცავს, დამსვენებელი არ აკლია. აქ ყოველ წელს ჩამოდიან როგორც ქართველი, ისე უცხოელი ტურისტები," - ამბობს სოფელ მუხურში მდებარე ჯანმრთელობის გაუმჯობესების ცენტრის "ლუგელას" დირექტორი თემურ თორდავა. მისი თქმით, კომპლექსი ერთდროულად 100 დამსვენებელს ემსახურება, აქ დასვენება დღე–ღამეში სამჯერადი კვებით 30-დან 35 ლარამდე ღირს. ქირავდება კერძო ბინებიც, სადაც ფასი ოდნავ დაბალია. რაც შეეხება ინფრასტრუქტურას, მას თორდავა დამაკმაყოფილებელს უწოდებს.
პასიური დასვენების გარდა კურორტზე სამთო ტურიზმის დანერგვასაც აპირებს. "კურორტზე ხშირად ჩამოდიან სპორტსმენები შეკრებებზე და მათთვის, დამსვენებლებისთვის და უცხოელი ტურისტებისთვის სამთო ტურები საინტერესო შეთავაზება იქნება. ბოლო წლებში გახშირდა უცხოელთა ვიზიტები, რომლებიც სვანეთში წასვლამდე რამდენიმე დღით "ლუგელაში" ჩერდებიან. კურორტს განვითარების კარგი შანსი აქვს, რაშიც მას გეოგრაფიული გარემო და კურორტის უნიკალური შესაძლებლობები ეხმარება," - ამბობს თემურ თორდავა.
სოფელ მუხურში არის მთისა და ზღვის შეზავებული, ჟანგბადით მდიდარი ჰაერი, სამკურნალო მინერალური წყლები, მათ შორის ყველაზე მნიშვნელოვანია ლუგელა.