ნანახია: 494

პარლამენტში ტელევიზიების ფინანსური დავალიანების ჩამოწერის საკითხზე მალე იმსჯელებენ, ტელეკომპანიების დავალიანება კი სახელმწიფოს წინაშე, ჯამში, 35 მილიონი ლარია. საგადასახადო კოდექსის 281-ე მუხლისთვის 21-ე პრიმა ნაწილის დამატების შემდეგ, ტელევიზიებს ვადაგასულ და მასზე დარიცხულ სანქციებს ჩამოაწერენ. თუმცა, ჯერ-ჯერობით უცნობია ცალკეული ტელევიზიების დავალიანებების ოდენობა. საგადასახადო კოდექსის თანახმად, ეს ინფორმაცია საგადასახადო საიდუმლოებაა, თუმცა, როგორც ცნობილი გახდა, დავალიანებების დიდი ნაწილი ნაციონალურ ტელეარხებზე მოდის.
ეს 35 მილიონი ის თანხაა, რომელიც ბიუჯეტს მოაკლდება და აქედან გამომდინარე, საქართველოს მოსახლეობას, ამიტომ საზოგადოებამ უნდა იცოდეს, თუ რომელ ტელეკომპანიას და რა მოცულობის დავალიანებას ჩამოაჭრიან.
ამასთან, საინტერესოა, მაინცდამაინც ახლა რატომ გაახსენდა ხელისუფლებას თავისუფალი სიტყვის მნიშვნელობა და ტელეკომპანიებისთვის დავალიანებების ჩამოწერის აუცილებლობა. იმიტომ ხომ არა, რომ არჩევნები მოახლოვდა.

ტელეკომპანიების ერთი ნაწილი სახელმწიფოს წინაშე დავალიანების არსებობას უარყოფს. ხოლო მეორე ნაწილი დავალიანებას მართალია აღიარებს, მაგრამ უკანონოდ დარიცხულ დავალიანებაზე საუბრობს.
ამასთან, როგორც ცნობილი გახდა, 35 მილიონიდან 5 მილიონი ლარი რეგიონულ ტელეკომპანიებზე მოდის, ვალის დიდი ნაწილი კი მსხვილ ტელეკომპანიებზე.
ექსპერტთა ნაწილის მოსაზრებით, მიმდინარე პერიოდში ამნისტიის განხორციელება ტელეკომპანიების არათანაბარ მდგომარეობაში გამოიწვევს, რადგან ის ტელეკომპანიები, რომელთაც დავალიანებები გადახდილი აქვთ, იჩაგრებიან. ამით შესაძლოა, კომპანიების სტიმულირება მოხდეს, რომ მათ მომავალში სახელმწიფოს გადასახადები არ გადაუხადონ იმ იმედით, რომ ხელისუფლება ამ დავალიანებებს ადრე თუ გვიან ჩამოაჭრის.

ნინო გოგელაშვილი