ეჭვი არავის ეპარებოდა იმაში, რომ დასავლურ კოალიციას არა უშუალოდ ლიბიის მოქალაქეების დაცვა, არამედ მუამარ კადაფის რეჟიმის დამხობა სურდა. ამ მოსაზრების დამადასტურებელი ოფიციალური დოკუმენტი ამ დღეებში დაიდო კიდეც.
,,საომარი მოქმედებები მანამ გაგრძელდება, სანამ კადაფი არ დატოვებს პოსტს", - განაცხადეს აშშ-ს პრეზიდენტმა ბარაკ ობამამ, საფრანგეთის პრეზიდენტმა ნიკოლა სარკოზიმ და დიდი ბრიტანეთის პრემიერ-მინისტრმა დევიდ კემერონმა. წარმოუდგენელია, რომ ის, ვინც საკუთარი ხალხის განადგურებას ცდილობს, კვლავ სახელმწიფოს სათავეში დარჩეს. სტატია, სადაც ეს განცხადება გაჟღერდა, ერთდროულად გამოქვეყნდა ბრიტანული ,,ტაიმსის~, ფრანგული ,,ფიგაროსა" და ამერიკული "ვაშინგტონ პოსტის" ფურცლებზე.
ნატოსა და პარტნიორთა კოალიციის ძალები განაგრძობენ სამხედრო ოპერაციებს ლიბიის მოქალაქეების დასაცავად და არსებული რეჟიმის ზეგავლენის შესასუსტებლად. დასავლელი ლიდერების აზრით, მხოლოდ პოლკოვნიკს, სამხედრო პირს შეუძლია ამ ეტაპზე უხელმძღვანელოს ლიბიაში განვითარებულ მოვლენებს., ხოლო შემდგომ დაიწყოს რადიკალური რეფორმები, რომელსაც სხვა პიროვნება წარმართავს. ობამა, სარკოზი და კემერონი აცხადებენ, რომ აშშ, საფრანგეთი და ბრიტანეთი მანამ არ გაჩერდებიან, სანამ გაეროს უშიშროების რეზოლუციები არ შესრულდება. ამის შემდეგ კი ამ ქვეყანაში რეფორმების გატარებას უხელმძღვანელებს არა გაეროს წარმომადგენელი, არამედ თვითონ ლიბიელები. ოფიციალური ტრიპოლის რეაქციამ არ დააყოვნა. მართალია, უშუალოდ კადაფის არ გაუკეთებია კომენტარი, თუმცა მისი ქალიშვილის, აიშას სიტყვებით, ამგვარი განცხადება ლიბიელი ხალხის შეურაცხყოფაა. დასავლელი ლიდერების სტატია მას შემდეგ გამოჩნდა, რაც ლიბიის შიდა კონფლიქტის დიპლომატიური გზით მოგვარების მცდელობა მარცხით დასრულდა. აფრიკის კავშირის გეგმა, რომლითაც კადაფისა და ოპოზიციას შორის შუამავლობას შეეცადნენ, ვერ განხორციელდა. ლიბიის დიქტატორის ოპონენტებმა ცეცხლის შეწყვეტაზე უარი განაცხადეს. სანამ კადაფი და მისი ოჯახის წევრები ხელისუფლების სათავიდან არ წავლენ, ოპონენტები მათთან მოლაპარაკებას არ აპირებენ.
ამბოხებულებმა დასავლეთის კოალიციურ ძალებს გააქტიურებისკენ მოუწოდეს. ლიბიის კონფლიქტის დიპლომატიური გზით მოგვარების შესაძლებლობა განიხილეს ბერლინში ორდღიან შეხვედრაზე ნატოს წევრი ქვეყნების დიპლომატებმაც. მოლაპარაკებებმა უნდა დაადასტუროს ალიანსიის ერთიანი პოზიცია ლიბიის კონფლიქტთან მიმართებაში, კერძოდ, კადაფისთან მოლაპარაკებები მხოლოდ იმ შემთხვევაში გაიმართება, თუ იგი დატოვებს პოსტს და გადადგება.
რეგისტრაცია!
