ნანახია: 547

ჩინელი მოქალაქეები ბიუჯეტს ყოველწლიურად 1,4 ტრილიონ დოლარს უმალავენ

ჩინეთის მოქალაქეები საგადასახადო სამსახურებისგან ყოველწლიურად 1,4 ტრილიონი დოლარის შემოსავლებს მალავენ. ამის შესახებ China Reform Foundation (CRF)–ის სპეციალისტები აცხადებენ და აღნიშნავენ, რომ შემოსავლების დაფარვას ჩინეთში უზარმაზარი მასშტაბები აქვს, რადგან "გადამალული" ფული ქვეყნის მშპ–ის 30%–ს აღწევს.
CRF–ის მონაცემებით, საშუალო სტატისტიკური ჩინური ოჯახი წელიწადში 4,7 ათას დოლარზე ცოტა მეტს გამოიმუშავებს, რაც ოფიციალურ მონაცემებს თითქმის ორჯერ აღემატება. რაც შეეხება მდიდრებს, აქ განსხვავება ოფიციალურ მონაცემებსა და საექსპერტო დასკვნებს შორის თითქმის სამმაგია. ყველაზე კანონმორჩილნი კი უღარიბესი ოჯახები აღმოჩნდნენ: ციფრებში განსხვავება ამ შემთხვევაში მხოლოდ 13%–ია.
გამოდის, რომ ყველაზე ცუდი გადამხდელები ჩინეთის მოსახლეობის 20%–ია, რომლებიც შემოსავლების 80%–ზე მეტს მალავენ. ამჟამად ჩინეთში ღარიბებსა და მდიდრებს შორის ქონებრივი განსხვავება მსოფლიოში ერთ–ერთი ყველაზე მაღალია იმის მიუხედავად, რომ ქვეყნის ამჟამინდელი ხელისუფლება თავის პრიორიტეტად სოციალურ უთანასწორობასთან ბრძოლას აცხადებს.
"შავი" შემოსავლების ძირითადი წყარო მექრთამეობა და შემოსავლიდან მიღებული წილებია. ეს უკანასკნელი განსაკუთრებით სამშენებლო და თამბაქოს ბიზნესში ფიგურირებს.
თუმცა კანონდამრღვევებთან ბრძოლას ჩინეთის ხელისუფლება არ ჩქარობს.
"გადასახადებისგან თავის არიდების მთავარი მიზეზი ძალიან მაღალი საპროცენტო განაკვეთია: საშუალოდ მოქალაქეები ხელისუფლებას შემოსავლების 40%–ს უხდიან. თუ გავითვალისწინებთ, რომ სახელმწიფოს მიერ გატარებული სოციალური პოლიტიკა ჩინელებს არ აძლევს, მაგალითად, ღირსეული სამედიცინო მომსახურების საშუალებას, მათი მიდრეკილება გადასახადების დამალვისკენ სრულიად გასაგებია," – აღნიშნავს Chatham House–ის ექსპერტი ქერი ბრაუნი.