ნანახია: 462

საბერძნეთი იძულებულია, კვლავ გაზარდოს გადასახადები. ეს 2011 წელს მოხდება და შედეგად ქვეყანა დამატებით 4,5 მილიარდ ევროს მიიღებს. გარდა ამისა, ათენი ამ გზით ბიუჯეტის დეფიციტის შემცირებას გეგმავს, რაც ევროკავშირისა და სავალუტო ფონდის მოთხოვნაცაა.
მაისში საბერძნეთმა საგარეო ვალის დეფოლტი აიცილა თავიდან და მასშტაბური რეფორმების სანაცვლოდ მრავალმილიარდიანი კრედიტები მიიღო. შედეგად, მიმდინარე წელს ათენმა მკვეთრად შეზღუდა ხარჯები და გაზარდა გადასახადები, მათ შორის დღგ.
გადასახადების მატების ახალი ფაზის ფარგლებში ხელისუფლება დღგ-ს 11-დან 23%-მდე გაზრდას აპირებს საქონლის ერთ მესამედზე, რომლებიც ამჟამად დაბალი განაკვეთით იბეგრება. ეს კი ფასების ზრდას და ეკონომიკაზე ინფლაციურ ზეწოლას გამოიწვევს, თუმცა ბიუჯეტს მილიარდამდე ევროს მოუტანს.
ასევე იგეგმება გადასახადების მატება უძრავ ქონებაზე, უკანონოდ აშენებულ ნაგებობებზე, ავტომობილებზე გზებით სარგებლობისთვის, მენეჯერების ბონუსებზე და ა.შ.