რას მიიღებს საქართველო რუსეთისთვის WTO-ში შესვლაზე ვეტოს მოხსნის სანაცვლოდ? ამ საკითხზე რუსეთმა ახალი ფსონი დადო. თუმცა მისი ღირებულება ნაკლებად მიმზიდველია საქართველოსთვის. თუ ამდაგვარ წინადადებებს დათანხმდა, ესე იგი, საქართველოს ხელისუფლება რაღაც სხვა, მნიშვნელოვან ფარულ გარიგებაზე მიდის.
"თუკი იქნება მყარი გარანტია, რომ მსოფლიო სავაჭრო ორგანიზაციაში (მსო) გაწევრიანების თანხმობის სანაცვლოდ, რუსეთი საქართველოსთან ეკონომიკურ ურთიერთობებს აღადგენს, ლოგიკური იქნება მთავრობა ამ საკითხზე დაფიქრდეს. აქ მთავარია გავაანალიზოთ, გვიღირს ტვირთებზე კონტროლის აღდგენად, ჩვენი მთავარი კოზირის დათმობა", - ასე აფასებს პოლიტოლოგი რამაზ საყვარელიძე რუსეთის პრეზიდენტის, დიმიტრი მედვედევის განცხადებას, რომ მსო-ში გაწევრიანებაზე თანხმობის სანაცვლოდ რუსეთი მზადაა საქართველოს ტვირთების მოძრაობის შესახებ ინფორმაცია ელექტრონული ფოსტით მიაწოდოს.
პოლიტოლოგი მიიჩნევს, რომ ორ ქვეყანას შორის ურთიერთობების აღდგენა აუცილებელია, რის შემდეგაც მთავარ პოლიტიკურ საკითხებზე მოლაპარაკებების დაწყებაც უფრო ადვილი იქნება.
რამაზ საყვარელიძის შეფასებით, დიმიტრი მედვედევი საქართველოს რუსულენოვანი ტელეარხის „პიკი", სატელევიზიო არხისათვის „რაშა თუდეი" და რადიოსადგურის „ეხო მასკვი" მიცემული მთელი ინტერვიუს მანძილზე ახალგაზრდა ლიბერალი პოლიტიკოსის იმიჯის მორგებას ცდილობდა, რაც საყვარელიძის აზრით მისი წინასაარჩევნო კამპანიის ნაწილია.
''მან ხაზი გაუსვა იმ ფაქტს, რომ ის ლიბერალი, ახალგაზრდა პოლიტიკოსია, ვფიქრობ, მთელი ინტერვიუს მანძილზე ის ამ იმიჯის განმტკიცებას ცდილობდა. ამიტომაც აფიქსირებს პუტინისგან რადიკალურად განსხვავებულ პოზიციას. არ გამოვრიცხავ, რომ ეს ინტერვიუ წინასაარჩევნო პიარ-კამპანიის ნაწილი იყოს და მედვედევს დემოკრატიული მოქალაქეების, თუ მსოფლიო ლიდერების სიმპათიის დამსახურება სურდეს, პუტინს კი პირიქით, „დერჟავული" ამბიციები აქვს. ფაქტია, რომ ეს ორივე ფიგურა სხვადასხვა რამეს ლაპარაკობს. რომ არა ასეთი რადიკალური განსხვავება პრეზიდენტისა და პრემიერის განცხადებებს შორის, შეიძლებოდა მედვედევის ინტერვიუში ოპტიმისტური ნოტების დანახვაც", - განაცხადა რამაზ საყვარელიძემ.
შეგახსენებთ, რომ რუსეთის პრეზიდენტმა დიმიტრი მედვედევმა ინტერვიუში საქართველო - რუსეთის ურთიერთობებზე ისაუბრა.
ნოდარ ხიდურელი
რეგისტრაცია!
