ნანახია: 452

ეს შესაძლებლობა ქართველ ტრეიდერებს მას შემდეგ მიეცათ, რაც რუსეთმა პირველი ივლისიდან ხორბლის ექსპორტზე შეზღუდვა მოხსნა. რუსეთის მთავრობის მიერ ინფორმაციის გავრცელებისთანავე, ქართველმა ტრეიდერებმა რუსულ მხარესთან მოლაპარაკებები განაახლეს და ამ დროისთვის 20-30 ათასი ტონა ხორბლის იმპორტზე ხელშეკრულებები რუსულ მხარესთან უკვე დადებულია.
ხორბლისა და პურ-პროდუქტების მწარმოებელთა ასოციაციის დირექტორი ლევან სილაგავა ვარაუდობს, რომ მსოფლიოში წელს ხორბლის უკეთესი მოსავალია, რაც შარშანდელთან შედარებით ხორბალზე ფასის შემცირებას შეუწყობს ხელს, ამას კი ემატება რუსეთის მიერ ხორბლის ექსპორტზე ემბარგოს მოხსნაც, რაც ამ შანსს კიდევ უფრო ზრდის. ამას ემატება საქართველოში მოყვანილი ხორბლის მოსავლის სახარბიელო პროგნოზი. სილაგავა ამბობს, რომ ხორბლის ნათესი 40 ათას ჰექტარ მიწის ფართობზეა (კერძო ნაწილის გამოკლებით). ჰექტარზე კი საპროგნოზოდ 3 ტონა მოსავლის მიღება ივარაუდება, რაც მთლიანობაში 120-150 ათას ტონას (70% სასურსათო) უდრის.
სილაგავა განმარტავს, რომ ბაზარზე ხორბლის ფასები საქართველოშიც დაიწყებს შემცირებას - 1 ტონა ხორბლის ფასი ფოთამდე სავარაუდოდ 300-320 აშშ დოლარის ფარგლებში შენარჩუნდება, 1 ტომარა ფქვილზე კი ამ დროისთვის ფასი 43 ლარია, რაც შესაძლოა კიდევ უფრო შემცირდეს.
მიმდინარე წლის გაზაფხულისთვის ფოთამდე მოტანილი 1 ტონა ხორბლის ფასი 385 აშშ დოლარი (ამას ემატება განბაჟების 18%, ტონა ხორბლის ტრანსორტირება 20 აშშ დოლარი და სხვა ხარჯები) იყო, 1 ტომარა ფქვილი კი ბაზარზე ხარისხის შესაბამისად, 48-50 ლარი ღირდა.
საქართველო ყოველწლიურად 800 ათას ტონა ხორბალს მოიხმარს. რუსეთის მიერ ემბარგოს გამოცხადებამდე, საქართველოში მოხმარებული ხორბლის 75% სწორედ ამ ქვეყნიდან შემოტანილზე მოდიოდა, 12% ადგილობრივ ხორბალს ეკავა, დანარჩენი კი - ყაზახეთსა და უკრაინაზე. საქართველოში მოყვანილი ხორბლის მოსავლის პროგნოზის შესაბამისად, მისი წილი 20%-მდე გაიზრდება.