DataLife Engine > �� > ”პოპული” მომხმარებელს ისევ ატყუებს

სუპერმარკეტების ქსელ ”პოპულში” მომსახურების სფეროში არსებულ პრობლემებზე არაერთი სტატია გამოქვეყნდა, როგორც გაზეთების ფურცლებზე, ასევე საინფორმაციო სააგენტოების ვებ-გვერდებზე. თუმცა, როგორც ჩანს პრობლემა ამ სფეროში კვლავ დარჩა და ”პოპულის” ხელმძღვანელობა არც კი აპირებს მათ გამოსწორებას. "პოპულში” არსებულ პრობლემებს ჩვენს გაზეთში, რამდენიმე თვის წინ საკმაოდ ვრცელი სტატია მიეძღვნა, მასალაში საუბარი მომსახურების სფეროში არსებულ არაერთ პრობლემას შეეხო, თუმცაღა ამდენი ხნის გასვლის შემდეგ ეს პრობლემები კვლავ გადაუჭრელია და მომხმარებლებს იგივე პრეტენზიები აქვთ.
ამ სტატიის მიზანი არ არის ”პოპულს” საზოგადოების თვალში უარყოფითი მხრიდან ჩვენება, ჩვენ არც მათი გაყიდვების შემცირების სურვილი გვაქვს და მითუმეტეს მომხმარებლების სხვა სუპერმარკეტში გადაბირების. პირიქით, ჩვენი გაზეთი მიესალმება ქვეყანაში ძლიერი ბიზნესსექტორის არსებობას, ჩვენი ყოველი მასალა ბიზნესის გაჯანსაღებისა და მომხმარებლისთვის სწორი ორიენტირების დასმაზეა ორიენტირებული.
ამ შემთხვევაში, უბრალოდ, გვსურს ”პოპულის” ხელმძღვანელობას, კიდევ ერთხელ მივაწვდინოთ საზოგადოების საჩივრები. ჩვენ გვსურს, რომ ”პოპულის” ქსელი განვითარდეს, თუმცა, არა საზოგადოების ინტერესების უგულველყოფისა და ჩვეულებრივი ადამიანების დაზარალების ხარჯზე. ალბათ, დადგა დრო, რომ ქვეყნის უდიდესი სავაჭრო ქსელის ხელმძღვანელობა არამარტო გაფართოებაზე, არამედ სერვისის და მომსახურების დონის ამაღლებაზეც დაფიქრდეს. მომხმარებლისთვის ხარისხიანი მომსახურება უფრო მნიშვნელოვანია, ვიდრე ნარინჯისფერი შეფერილობის მაღაზიაში სურსათის შეძენა. დღეს ჩვენს ქვეყანაში სასურსათო მაღაზიები ბევრია, მომსახურების ის ხარისხი კი, რომელსაც ”პოპულის” დონის სუპერმარკეტებისგან ელის ძალიან ცოტა.
პრობლემები უხვადაა, როგორც მომსახურების ხარისხთან, ასევე პროდუქტის ვარგისიანობასთან დაკავშირებით. სურსათის უვნებლობის ხარისხს დღევანდელ საქართველოში არავინ ამოწმებს, მიუხედავად იმისა, რომ პროდუქტის ხარისხის სტანდარტებთან შესაბამისობის კანონი უკვე კარგა ხანია არსებობს, ის ძალაში ჯერ არ შესულა. ამ შემთხვევაში, მომხმარებელს აქვს ერთადერთი არჩევანი, ის უნდა ენდოს ბრენდს, ანუ პროდუქტი ”პოპულის” დონის სავაჭრო პუნქტებში შეიძინოს. რაც შეეხება მომსახურებას, ჩვენი ყურადღება კიდევ ერთხელ მიიპყრო ”ძველმა” პრობლემამ, - დახლებზე არსებული ფასი ხშირად არ ემთხვევა სალაროში მითითებულ ფასს. ანუ, თუ პროდუქტის შერჩევისას, მომხმარებელი ითვალისწინებს დახლებზე მითითებულ ფასს, შეიძლება სალაროში თანხის გადახდისას, ეს მაჩვენებელი გაცილებით მაღალი იყოს.
ამ თემასთან დაკავშირებით, ინტერნეტ-სივრცეში არაერთი ”ფორუმია” გახსნილი, სადაც უმეტეს შემთხვევაში ამ ქსელის უკმაყოფილო კლიენტების კომენტარებია.
მომსახურე პერსონალს შევეხები. საზოგადოების უკმაყოფილება, უმეტეს შემთხვევაში, სწორედ მათკენაა მიმართული. უმრავლესობის აზრით, პერსონალი არაკომპეტენტურია და რაც მთავარია, უტაქტო და ხშირ შემთხვევაში უზრდელიც. ეს, რა თქმა უნდა, ყველა მომსახურე პერსონალს არ ეხება. პერსონალის დაბალი კვალიფიციურობა და აგრესიული ტონი საზოგადოებისთვის, ერთის მხრივ გასაგებია. სამუშაოსთვის შეუფერებელი ანაზღაურება და ხელფასების დაგვიანება, არის ის მთავარი ფაქტორები, რომელიც არსებული ხარვეზების მიზეზია. ე სკი არა მომსახურე პერსონალის, არამედ ქსელის მენეჯმენტის დამსახურებაა.
მეორე, მწვავე პრობლემა, რომელიც საზოგადოებას აწუხებს, ეს არის ფასების განსხვავება დახლსა და სალაროს კომპიუტერში. ხშირად დახლზე დაბალი ფასი წერია, სალაროსთან კი მომხმარებელს ზედმეტს ახდევინებენ, იმ არგუმენტით, რომ პროდუქტი ცოტა ხნის წინ გაძვირდა და დახლებზე ფასის შეცვლა ვერ მოვასწარითო.
ეს ფაქტი ერთ-ერთ მაღაზიაში, ან ერთხელ რომ შემთხვეოდა მომხმარებელს, ალბათ არც იქნებოდა სასაუბრო, მაგრამ რატომღაც ”პოპულიში” აღნიშნული მოვლენა პერმანენტულ ხასიათს ატარებს. როგორც უკვე აღვნიშნეთ, აღნიშნულ პრობლემაზე ”ბ&ფ” რამდენიმე თვის წინ წერდა. ჩვენი ხელახალი დაინტერესება კი დაახლოებით, ერთი კვირის წინ საინფორმაციო სააგენტო ”GHN”-ის მასალამ გამოიწვია, სადაც ნაცნობ პრობლემაზე იყო საუბარი.
მომხმარებლის აზრის გასაგებად თბილისის ფორუმს გადავხედეთ. ვებ-გვერდის თითქმის ყველა მომხმარებელი საუბრობს, რომ მას არაერთხელ მოუწია სალაროსთან მეტის გადახდა, ვიდრე რეალურად უნდა გადაეხადა. პრეტენზიების შემდეგ კი ახსნა ყოველთვის ერთია, პროდუქტი ახლახან გაძვირდა. ამ პრობლემის შესახებ, ხსენებულ მასალაზე მუშაობის დროს ჩვენმა ჟურნალისტმა ექსპერიმენტიც კი ჩაატარა. შარტავას ქუჩაზე არსებული ”პოპულის” ერთ-ერთ სუპერმარკეტში, ჟურნალისტმა რამდენიმე დასახელების პროდუქტი შეარჩია, რომელთა საერთო ფასი, დახლებზე მითითებული ფასების თანახმად, 32 ლარი უნდა ყოფილიყო, სალაროსთან მისულს კი 47 ლარი და 35 თეთრი გადაახდევინეს. ჟურნალისტის ამ საკითხით დაინტერესების შემდეგ, აუხსნეს, რომ ფასები განახლებულია, განახლებული ფასების ასახვა კი დახლებზე განთავსებულ პროდუქტებზე ჯერ არ მომხდარა.
ჩნდება კითხვა, მაშინ როგორ ვითარდება ”პოპულის” ქსელი და ამდენი უკმაყოფილო კლიენტი, რატომ სარგებლობს ისევ ამ ქსელის მომსახურებით. პასუხი მარტივია, პროდუქტის არჩევანი აქ სხვა სუპერმარკეტებთან შედარებით გაცილებით დიდია, ასევე, ”პოპული” 24 საათიან რეჟიმში მუშაობს. ხშირად მომხმარებლის პასუხი ასეთია, - სხვა არ არის და ამიტომ ვსარგებლობ მათი მომსახურებით. საზოგადოებას უნახავს (საზღვარგარეთ, ან თუნდაც ფილმებში) რას ნიშნავს ნორმალური მომსახურება, ზრდილობიანი მომსახურე პერსონალი და ხარისხიანი პროდუქტი.
ასე, რომ ჩვენი საზოგადოება სუპერმარკეტების ქსელის სიმრავლით, ვეღარ გაოცდება, ”პოპულის” ხელმძღვანელობას ვურჩევთ მომხმარებელი პროდუქტის ხარისხითა და მომსახურების დონით გააკვირვონ (ამჯერად სასიამოვნოდ).
რა თქმა უნდა, ძალიან კარგია რომ ”პოპულიმ” მრავალი სიახლე დანერგა და ცდილობს მაინც საერთაშორისო სტანდარტების შესაფერისი სერვისი შემოგვთავაზოს. ეს ცხადია, მაგრამ, გარეგნული იერი იმდენს არ ნიშნავს, რამდენსაც შიდა ატმოსფერო, კარგი დამოკიდებულება მომხმარებელთან და ელემენტარულად ფასების შესაბამისობა.
ერთი სიტყვით, როგორც ჩანს ”პოპულისთვის” დრო არ იცვლება. და, არ იცვლება ”პოპულის” საზოგადოებასთან ურთიერთობის სამსახური, რომელიც ვებ-გვერდზე მითითებულ საკონტაქტო ტელეფონის ნომრებს არც კი პასუხობს.

ნანა კალანდაძე