რუსული ენერგოგიგანტი "ინტერ რაო” ქართულ მხარესთან გაფორმებულ შეთანხმებაზე პირველ განმარტებებს აკეთებს. საუბარია ხრამის ჰიდროელექტროსადგურების კასკადზე, რომელშიც საქართველოს მთავრობა 104 მილიონ დოლარს მიიღებს. "ინტერ რაო” მზადაა, ელექტოსადგურების 100% შეიძინოს. თუმცა, კომპანიის საზოგადოებასთან ურთიერთობის სამსახურის უფროსის ნიკოლაი გორელოვის თქმით, პრივატიზაცია ჯერ არ დასრულებულა.
გორელოვი BBC-სთან ინტერვიუში ღიად აცხადებს, რომ "ინტერ რაოს” საქართველო-რუსეთს შორის პოლიტიკურ ურთიერთობასთან კავშირი არა აქვს. "მხოლოდ ბიზნეს-ინტერესები გვაკავშირებს. მოლაპარაკებაში თავიდანვე აღვნიშნეთ, რომ პოლიტიკა ბიზნეს-ინტერესებზე მნიშვნელოვანი არ უნდა გახდეს,” - აღნიშნავს გორელოვი. შეგახსენებთ: საქართველოს ენერგეტიკის მინისტრის განცხადებით, "ინტერ რაოსთან” თანამშრომლობა ეკონომიკურად და ტექნიკურად მომგებიანია. რუსული კომპანია 3 ახალ ჰიდროელექტროსადგურს ააშენებს და პროექტში 193 მილიონი დოლარის ინვესტირებას მოახდენს.
ენერგეტიკის სფეროს ექსპერტ ლიანა ჯერვალიძის შეფასებით, სავარაუდოდ, "ინტერ რაოს” გარდა, საშუალო ჰესების შესყიდვის მსურველი არავინ აღმოჩნდა. თუმცა ექსპერტის თქმით, ქართული ბაზარი რუსული კომპანიისთვის კომერციულად ძალიან მომგებიანია, ამიტომ პოლიტიკურ საფრთხეს ვერ ხედავს. ჯერვალიძის ცნობით, დღეს თბილისის დისტრიბუცია რუსეთის ხელშია, მაღალი ძაბვის გადამცემი ხაზები - რუსულ-ქართული კომპანიის, მაგრამ ახალ ჰიდროელექტროსადგურებზე ძირითადად სხვადასხვა კომპანიები არიან წარმოდგენილები. როგორც ექსპერტმა განაცხადა, საქართველოს ხელისუფლება, ცდილობს, ინვესტიციების დივერსიფიცირება მოახდინოს. მისივე თქმით, როცა ყველა დაწყებული პროექტი დასრულდება, რუსული კომპანიების წილი ქართული ენერგეტიკის ბაზარზე ისეთი დიდი არ იქნება, როგორიც დღეს ჩანს. ჯერვალიძის პროგნოზით, ეს 6 წელიწადში მოხდება.
რეგისტრაცია!
