ნანახია: 824

რუმინელები ბუნებრივი აირის გადამამუშავებელ ქარხანას შავ ზღვაზე ააშენებენ
უახლოეს მომავალში, საქართველოში რუმინეთიდან სპეციალური დელეგაცია ჩამოვა, რომელიც შავი ზღვის ქართულ სანაპიროზე ბუნებრივი აირის გადამამუშავებელი ქარხნების აშენების შესაძლებლობას შეისწავლის. ამის შესახებ შეთანხმება თურქეთში საქართველოს ენერგეტიკის მინისტრის რუმინელ კოლეგასთან შეხვედრის შემდეგ შედგა. ალექსანდრე ხეთაგურის განცხადებით, ამ პროექტის განხორციელების შემთხვევაში გაიზრდება აღმოსავლეთიდან დასავლეთისაკენ საქართველოს გავლით გაზის ტრანსპორტირების მოცულობა.
"კერძოდ, აზერბაიჯანიდან თურქმენული გაზი მოხვდება ევროპაში. ის შავ ზღვამდე ტრანსპორტირდება მილსადენით, ხოლო შავი ზღვიდან უკვე გათხევადებული გაზით მომარაგდება ევროპის ქვეყნები,"- განმარტავს ხეთაგური.
აღნიშნული პროექტის განხორციელების შემთხვევაში, ჩვენს ქვეყანაში გარკვეული რაოდენობის ინვესტიცია შემოვა, რაც თავისთავად დადებითი მოვლენაა. თუმცა, ამ პროექტის უაპელაციოდ მისაღებად განხილვა რთულია. საკითხავია, რატომ მაინცდამაინც საქართველოს ტერიტორიაზე უნდა აშენდეს ეს ქარხნები. მსგავსი პროექტის განხორციელება თავისუფლად შეიძლება თურქეთში, იმავე რუმინეთსა და შავიზღვისპირა ნებისმიერ ქვეყანაში. როგორც ცნობილია, ამგვარი პროექტების განხორციელება სერიოზულ ეკოლოგიურ საფრთხესთან არის დაკავშირებული. საქართველოს შავიზღვისპირა რაიონები უკვე ისედაც საკმარისად არის დაბინძურებული სხვადასხვა ნავთობგადამამუშავებელი ქარხნების ნარჩენებითა და გამონაბოლქვით.