ნანახია: 642

საქართველოში საავადმყოფოებისადმი დაინტერესება გაიზარდა. საქართველოში ორი საავადმყოფოს მოწყობაზე ორი განსხვავებული კომპანია იზრუნებს. დეტალები არ ხმაურდება. ყოველ შემთხვევაში ჯერჯერობით. დეტალების გახმაურება ხელშეკრულების გაფორმების შემდეგ იგეგმება. არ არის ცნობილი თუ რა პპრინციპით და რა კრიტეირიუმებით შეირჩა კომპანიები და რა კონკრეტული მისია ევალებათ. ეკონომიის სამინისტრომ უბრალო გადაწყვიტა და მის გადაწყვეტილებას სისრულეში სულ მალე მოიყვანს.
ერთადერთი, რაც ეკონომიკის სამინისტროს მხრიდან გახდა ცნობილი, ისრაელის სადაზღვევო კომპანია საქართველოს ჰოსპიტალურ სექტორში 40 მლნ. აშშ დოლარის ინვესსტირებას გეგმავს.
სადაზღვევო კომპანიის დასახელება და გარიგების სხვა დეტალები მას შემდეგ გახდება ცნობილი, რაც მომავალი კვირის დასაწყისში, ისრაელში, საქართველოს ეკონომიკური განვითარების მინისტრს ლაშა ჟვანიასა და კომპანიის წარმომადგენლებს შორის ხელშეკრულება გაფორმდება.
აღნიშნული კონტრაქტის გაფორმება მიმდინარე წლის ივნისში იგეგმებოდა, თუმცა გარკვეული მიზეზების გამო ხელმოწერა დაგვიანდა.
დაინტერესება კიდევ ერთმა თურქულმა კომპანიამ SILA გამოთქვა, რომელიც, ეკონომიკის სამინისტროს ინფორმაციით, 200 მლნ. დოლარის ინვესტირებას გეგმავს. ამის შესახებ 2 ივლისს ეკონომიკური განვითარების მინისტრს ლაშა ჟვანიასა და თურქული კომპანია SILA-ს სამეთვალყურეო საბჭოს წევრების შეხვედრის შემდეგ გახდა ცნობილი.
ეკონომიკის სამინისტროს ინფორმცაიით, კომპანია სამედიცინო სფეროში საქმიანობს და თურქეთსა და სხვა ქვეყნებში თანამედროვე სტანდარტებით აღჭურვილი საავადმყოფოთა ქსელი გააჩნია.
როგორც დელეგაციის ხელმძღვანელმა, იჰსან შაჰინმა მინისტრთან საუბრისას აღნიშნა, SILA-ს მთავარი მიზანია საქართველოში ჰქონდეს თანამედროვე ტექნოლოგიით აღჭურვილი საავადმყოფო, რომელიც მოემსახურება არამარტო საქართველოს, არამედ მთელი კავკასიის რეგიონის მოსახლეობას. ამ მიზნით, კომპანია ინვესტიციის ჩადებას საქართველოს სახელმწიფოს საკუთრებაში არსებულ რომელიმე საავადმყოფოში გეგმავს.
თურქი ბიზნესმენების განცხადებით, მათ შესაბამისი გამოცდილებაც აქვთ და საშუალებაც, რომ საქართველოში 200 მილიონი აშშ დოლარის ოდენობის ინვესტიცია განახორციელონ.

ირმა ზარნაძე