„სან პეტროლიუმ ჯორჯია", რომელიც ნავთობპროდუქტების ბაზარზე ბრენდით „გალფია" წარდგენილი, მომხმარებლისთვის ალტერნატიული პროდუქციის შეთავაზების სხვადასხვა ვარიანტს განიხილავს.
როგორც კომპანიაში განაცხადეს, აქტიურად განიხილება „გალფის" ბრენდირებულ ავტოგასამართ სადგურებზე (აგს) ბერძნული საწვავის მიწოდების საკითხი.
პარალელურ რეჟიმში მენეჯმენტი ბრენდირებული აგს-ების რაოდენობას ზრდის და ახლო მომავალში არსებულ 25 ბრენდირებულს კიდევ 15-ს შემატებს. კომპანია გააქტიურებას გეგმავს კორპორაციული გაყიდვების მიმართულებითაც.
Gulf-ი ქართულ ბაზარზე ავტოგასამართი სადგურების სამ ქსელს "მაგნატი", "სენტა" და „ეკო-ჯორჯია" აერთიანებს. ბოლო პერიოდში კომპანიამ სხვადასხვა ადგილას მიწის ნაკვეთები შეიძინა და გეგმის მიხედვით, 2012 წლის ბოლოსთვის "გალფს" უკვე 140 აგს ექნება ქვეყნის მასშტაბით.
კომპანია "სან პეტროლიუმ ჯორჯია" საქართველოში "გალფ ოილ ინტერნეშენალის" ოფიციალური დისტრიბუტორია და 2010 წლის ნოემბერში დაფუძნდა. "სან პეტროლიუმ ჯორჯიას" დამფუძნებელი და 100%-იანი წილის მფლობელი აშშ-ში რეგისტრირებული კომპანია Energy Investments Venture-ია. "სან პეტროლიუმ ჯორჯიას" ოპერირების დაწყებიდან 40 მლნ აშშ დოლარის ინვესტიცია აქვს განხორციელებული.
კომპანია "გალფ ოილი" ამერიკაში, ტეხასის შტატში 1901 წელს დაარსდა, როგორც "შევრონის" შვილობილი კომპანია. დღეისათვის "გალფ ოილ ინტერნეშენალი" ერთ-ერთი უმსხვილესი მულტინაციონალური ნავთობპროდუქტების კომპანიაა, რომელიც მსოფლიოს 70-ზე მეტ ქვეყანაში ოპერირებს. კომპანია ფოკუსირებულია უმაღლესი ხარისხის მქონე ნავთობ პროდუქტებისა და საპოხი მასალების რეალიზაციაზე.
რეგისტრაცია!
