საგურამოში ლუდის ქარხნის მშენებლობისთვის 27 მლნ ევროს ინვესტიციის განხორციელება იგეგმება.მშენებლობას „ქართული ლუდის კომპანია" ახორციელებს. როგორც კომპანიის მენეჯმენტში აცხადებს, „ქართული ლუდის კომპანია" საქართველოში ლუდისა და უალკოჰოლო სასმელების ბიზნესში გამოცდილების მქონე ქართველი მეწარმეების დაფუძნებულია, თუმცა ამ დროისთვის დამფუძნებელ კომპანიებზე დეტალები არ ხმაურდება.
„ლუდსახარშის მშენებლობა მთლიანად ქართული კაპიტალით ხორციელდება", - აცხადებენ კომპანიაში.
პირველ ეტაპზე ქარხანა 3 დასახელების ლუდის წარმოებას გეგმავს, მომავალში კი ლიმონათისა და წყლის წარმოება იგეგმება. ქარხნის სიმძლავრე წელიწადში 400 ათასი ჰექტოლიტრი ლუდისა და 300 ათასი ჰექტოლიტრი ლიმონათის წარმოებაზეა გათვლილი. რაც ადგილობრივი ბაზრის გარდა საექსპორტო ბაზრების ათვისების შესაძლებლობასაც იძლევა. ამ მიზნით მოლაპარაკებები დაახლოებით 15 ქვეყანასთან მიმდინარეობს.
ქარხანა ჩეხურმა კომპანიამ ZVU POTEZ დააპროექტა, მშენებლობას ქართული სამშენებლო კომპანიები ახორციელებენ.
ლუდსახარშის მშენებლობა საგურამოში 2012 წლის მარტისთვის დასრულდება.
სამეწარმეო რეესტრში არსებული ინფორმაციით, „ქართული ლუდის კომპანიის" 100%-იანი წილის მფლობელი მურმან გრიგოლიაა. ცოტა ხნის წინათ გამართულ სს-ის აქციონერთა კრებაზე ემისიის გზით კომპანიის კაპიტალის ზრდის საკითხი განიხილეს. ამ დროისთვის მიღებულ გადაწყვეტილებასთან დაკავშირებით დეტალები არ ხმაურდება.
რეგისტრაცია!
