სუპერმარკეტ “არმენიას” ქართულ ბაზარზე შემოსვლა წარმატებული აღმოჩნდა, რის გამოც მენეჯმენტი თბილისში ახალი ობიექტის დამატებასაც არ გამორიცხავს. ამის შესახებ სუპერმარკეტის წარმომადგენელმა commersant.ge–ს განუცხადა.
შეგახსენებთ: მაღაზია ქეთევან წამებულის 12 ნომერში მაისში გაიხსნა და მასში სომხეთიდან შემოტანილი ნაწარმი – ძეხვეული, სასმელები, კონსერვები, ტკბილეული და სხვა პროდუქციაა წარმოდგენილი.
კომპანიაში ამბობენ, რომ ისინი ადგილობრივ სავაჭრო ქსელებს კონკურენციას არ უქმნიან, რადგან მხოლოდ სომხური პროდუქტებით ვაჭრობას ეწევიან, თანაც ფასები ქართულ სამომხმარებლო ბაზარზე არსებულისგან არ განსხვავდება.
ქართული სავაჭრო ქსელები ახალი მაღაზიის გახსნამდე პროგნოზირებდნენ, რომ „არმენია“ მათ კონკურენციას ვერ გაუწევდა: “იოლის” ქსელის გენერალური დირექტორის გიორგი ჩუმაშვილის განცხადებით, „არმენია“ ბოლომდე დამკვიდრებული არც თავად სომხეთშია, ხოლო ქართულ ბაზარზე სომხური პროდუქციიდან მოთხოვნა მხოლოდ სომხურ კონიაკზეა, ამიტომ ჩუმაშვილისთვის გაუგებარია, რა სტრატეგიას ეფუძნება „არმენიას“ საქართველოში შემოსვლა.
თავად „არმენიაში“ კი დღეს ამბობენ, რომ ქართულ ბაზარზე მოთხოვნა ბევრ სომხურ პროდუქტზეა. მათ შორის კონიაკები, ღვინო და ტკბილეული გამოირჩევა.
რეგისტრაცია!
