ნანახია: 475

ხელისუფლება ბაზრობებსა და ბაზრებზე კონტროლის გამკაცრებას გეგმავს. პარლამენტში უკვე ინიცირებულია კანონპროექტი, რომელიც ბაზრებისა და ბაზრობების მოწყობის წესების დარღვევისთვის ჯარიმებს აწესებს.
კანონპროექტის მიხედვით, ბაზრის ან ბაზრობის მოწყობა თვითმმართველი ერთეულის მიერ დადგენილი წესის დარღვევით, ფიზიკური პირის 100 ლარით დაჯარიმებას გამოიწვევს, იურიდიული პირებისა კი 200 ლარით. ამავე პროექტით, თვითმმართველი ერთეულის მიერ დადგენილი წესის მოთხოვნებთან შესაბამისობაში ბაზრის მოყვანის თაობაზე, თვითმმართველი ერთეულის მოთხოვნის შეუსრულებლობა, ფიზიკური პირის 500 ლარით, ხოლო იურიდიული პირის 100 ლარის ოდენობით დაჯარიმებას გამოიწვევს.
კანონპროექტში ხაზგასმულია, რომ პასუხისმგებლობა დაეკისრება პირს, ვის სარგებლობაშიც იმყოფება ბაზრის ან ბაზრობისთვის განკუთვნილი ტერიტორია, ხოლო თუ ასეთი პირი ვერ დადგინდა, მაშინ პასუხისმგებლობა ბაზრისთვის განკუთვნილი ტერიტორიის მესაკუთრეს დაეკისრება. ასევე, თუ პირმა დაჯარიმების მიუხედავად იგივე საქმიანობა გააგრძელა, მაშინ ეს ფაქტი ახალი სამართალდარღვევის ჩადენად ჩაითვლება.
"თუ არ იქნა პასუხისმგებლობის ზომები დაწესებული, შეუძლებელია თვითმმართველი ერთეულის მიერ მარეგულირებელი ნორმების დადგენას ჰქონდეს რამე აზრი", – ნათქვამია კანონპროექტის განმარტებით ბარათში, რომლის ავტორი ბათუმის მერიაა.
კანონპროექტის განხილვა პარლამენტში, სავარაუდოდ, მომავალ კვირას დაიწყება და დეპუტატები საკმაოდ ხმაურიან განხილვებს ვარაუდობენ.