საქართველოში საახალწლო ონლაინ-შოპინგის ბუმი დაიწყო. ინტერნეტ_მაღაზიების მომხმარებელთა რიცხვი შარშანდელთან შედარებით 60% გაიზარდა. მიუხედავად იმისა, რომ ეს სფერო ქართული საზოგადოებისთვის შედარებით ახალია და ძირითადად მომხმარებელს ხელზე ყიდვა უფრო მეტად ურჩევნია, არის საზოგადოების ისეთი ნაწილიც რომლებიც ვირტუალურ ვაჭრობას ამჯობინებს. ამრიგად, უცხოური ონლაინ-მაღაზიებით სარგებლობამ საკმაოდ მოიკიდა ფეხი საქართველოშიც და ბოლო პერიოდში ამგვარი საიტები მრავლად შეიმჩნევა ჩვენს ვებ-სივრცეში.
ყველაზე დიდი მოთხოვნა ინტერნეტ-მაღაზიებში არის ტანსაცმელზე, ფეხსაცმელზე და აქსესუარებზე, ხოლო რაც შეეხება ტექნიკას, ძირითადი მოთხოვნა საყოფაცხოვრებო ნივთებზე, ჯამ-ჭურჭელზე და თეთრეულზეა.
როგორც სატრანსპორტო კომპანიების წარმომადგენლები აცხადებენ, მათი საკურიერო სამსახური თვეში 1000 ამანათს არიგებს და მათი რიცხვი სტაბილურად მატულობს. ამანათის ჩამოტანის ფასი 8-15 დოლარის (1კგ) ფარგლებში მერყეობს. მომხმარებელთა უმეტესობა საახალწლო ფასდაკლებებს ელოდება, ამ მხრივ ამერიკულ ონლაინ-შოპინგის საიტებზე დიდი ბუმია, რასაც ვერ ვიტყვით ევროპულ საიტებზე სადაც პროდუქციაზე საკმაოდ მაღალი ფასებია და შესაბამისად მათზე მოთხოვნა საქართველოში ნაკლებია.
საქართველოს კანონმდებლობით საფოსტო ამანათების შესახებ ნათქვამია, რომ თუ ამანათის ღირებულება სცდება 300 ლარს, მყიდველს მისი განბაჟება უწევს. განბაჟება ხდება იმ შემთხვევაშიც, თუ არის ერთგვაროვანი საქონელი, ან ამანათის საერთო წონა აღემატება 30 კგ.ს.
მომხმარებლის ყოველდღიური ცხოვრება სულ უფრო მჭიდროდ უკავშირდება კომპიუტერს. ინტერნეტ მომხმარებლების რაოდენობა დღითი-დღე იზრდება და არც არის გასაკვირი, რომ ”ინტერნეტ შოპინგმა” კიდევ უფრო ფართო მასშტაბები შეიძინოს.
ირინა დეისაძე
რეგისტრაცია!
