ნანახია: 622

1. მიგაჩნიათ თუ არა, რომ "ეკონომიკური თავისუფლების აქტი" ქვეყანაში აკანონებს "სინგაპურიზაციის" და ოფშორიზაციის პროცესს, თუ არ ეთანხმებით ამას, მაშინ იქნებ ახსნათ, რა განსხვავებაა მალდივის ან კაიმანის კუნძულების ეკონომიკებს და იმ ტოტალიტალურ ეკონომიკას შორის, რომელიც ამ აქტით მკვიდრდება. და ბოლოს, აღიარებთ თუ არა, რომ "ეკონომიკური თავისუფლების აქტი" ძირფესვიანად და კონცეპტუალურად ეწინააღმდეგება ლიბერალიზმისა და ლიბერალური ეკონომიკის ევროპულ და ამერიკულ გაგებასა და ღირებულებებს. ამ აქტით და სხვა თანმდევი ნაბიჯებით ხდება ქვეყნის დესუვერენიზაცია, დერეგულაცია, დეცენტრალიზაცია და დეზინტეგრაცია, ხოლო ჩვენთვის საოცნებო სინგაპურს 50 წელია მართავს ერთი პარტია ლიკუანიუ, სინგაპურის მმართველი "უხსოვარი დროიდან", სინგაპურის პარლამენტში კი ერთი-ორი სხვა პარტიის წევრიცაა?
2. საქართველო დასავლური გაერთიანებებისკენ მიისწრაფის, მათ შორის ევროკავშირისკენ. ეროვოპასთან ინტეგრაციის დასაჩქარებლად ევროკავშირმა საქართველოს 4 კრიტერიუმის შერულების რეკომედაცია მისცა: სტატისტიკის დეპარტამენტის რეფორმა, სურსათის ხარისხის კონროლი, ანტიმონოპოლიური კანონმდებლობის შექმნა და შრომის კოდექსის დახვეწა. "ეკონომიკური თავისუფლების აქტი" ეწინააღმდეგება, ევროკავშირის რეკომენდაციებს და შესაბამისად ჩევნი ქვეყნის ევროპასთან ინტეგრაციას. ეთანხმებით თუ არა, რომ საქართველოს ამ აქტის მიღებით ევროკავშირთან ინტეგრაცია გაუჭირდება?
3. რის გაკეთებას გეგმავს მთავრობა ბიზნესის კორუფციისგან გასათავისუფლებლად, რომელიც შეზრდილია ხელისუფლებასთან და ბიზნესის არცერთი მიმართულებით კონკურენცია, როგორც ასეთი არ არსებობს?

ზურაბ პოლოლიკაშვილი, საქართველოს ეკონომიკური განვითარების მინისტრი, - "ძალიან საინტერესო შეკითხვაა. ლიბერალიზაცია, რომელიც "ეკონომიკური ლიბერალიზაციის აქტით" განხორციელდება, არ არის მიმართული იმისკენ, რომ ჩვენ რომელიმე ქვეყანას დავემსგავსოთ. იდეა არის ის, რომ საქართველო იყოს ყველასგან გამორჩეული ქვეყანა, რომელიც ორიენტირებული იქნება იქითკენ, რომ ქვეყანაში ეკონომიკა განვითარდეს და ცხოვრების დონემ აიწიოს.
ჩვენი ყოველი გადადგმული ნაბიჯის დროს ვითვალისწინებთ ევროკავშირის რეკომენდაციებსა და მათ შესაბამისად ხდება გადაწყვეტილებების მიღება. აქედან გამომდინარე, ამ აქტის მიღება სულაც არ უშლის ხელს ევროკავშირთან ინტეგრაციის პროცესს.
რაც შეეხება ბიზნესის კორუმპირებულობას, თუ ვინმე ვერ ხედავს იმ განსხვავებას, რაც ხდება დღეს და რაც 2-3-5-7 წლის წინ ხდებოდა, მაშინ ამაზე საუბარი და ამის ახსნა ძალიან რთული იქნება".
თემურ ჭყონია, ბიზნესმენი, - ეკონომიკური თავისუფლების აქტი, როგორც დოკუმენტი, ჯერ არ გამოქვეყნებულა, მისი მხოლოდ სათაურებია ცნობილია. ამიტომ ამ აქტის სხვა სრულყოფილ აქტებთან შედარება შეცდომაა. ჯერ გამოქვეყნდეს და მერე განვსაჯოთ. ამ ინიციატივის ერთ მუხლს მე პირადად გამართლებულად მივიჩნევ, რომ საქართველოში, პატარა ქვეყანაში, სადაც პატარა ბიზნესმენებია, ანტიმონოპოლიური სამასხური ზედმეტია.
ის განცხადებები, რომ საქართველოში ბიზნესი კორუმპირებულია, არასერიოზულად მიმაჩნია. ვისაც საკონკურენციო ბიზნესი არ აქვს, მისთვის კონკურენციაც არ არის შესაბამისად, ხოლო მათ ვისაც ბიზნესი გვაქვს, საკმაოდ სერიოზულ კონკურენციშიც ვიმყოფებით. ვისაც ბიზნესი არ აქვს, იმას არც კონკურენცია აქვს და არც ჭკუა".
ზურაბ გვასალია, საქართველოს ბანკების ასოციაციის პრეზიდენტი, - "ჯერ ეს აქტი მარტო დეკლარაციის დონეზეა გაკეთებული. იგი დახვეწასა და საკანონმდებლო აქტის სახის მიცემას საჭიროებს. ის რომ ახლავე ვთქვათ, რომ იდეა არ ვარგა და სინგაპურიზაციას გამოიწვევს, არასწორად მიმაჩია. თუ მოხდება სინგაპურიზაცია, მე ამას შეფასებას აუცილებლად მივცემ, როდესაც ეს იდეა საკანონმდებლო დონეზე გამაგრდება. მას წინ უნდა უძღოდეს მსჯელობა, განხილვა, კერძო სექტორთან ერთად იმ მომენტების განხილვა, რომელთანაც ჩვენ ჩვენი ხედვა გვაქვს. თავად იდეას მე მივესალმები. ვფიქრობ, პირველი შემთხვევაა, როდესაც მთავრობა აკეთებს იმის მინიშნებას, რომ იგი საკანონმდებლო დონეზე მოახდენს თავისი უფლებების შეზღუდვას. საკანონმდებლო დონეზე ხდება ის, რომ ბიუჯეტი იყოს სოციალურად ორიენტირებული და მე არ ვეთანხმები მოსაზრებას, რომ ამით სამომავლოდ მთავრობებს უკრავენ ხელ-ფეხს.
რაც შეეხება გადასახედების რეფერენდუმით ცვლილებების იდეას, ითქვა, რომ გადამხდელები არასოდეს დათანხმდებიან გადასახადის აწევას. ასე იმ შემთხვევაში მოხდება, თუ ამის არგუმენტაცია შეუძლებელი იქნება. მაგრამ თუ ეს ქვეყნის ინტერესებიდან გამომდინარე მოხდება და ეს შესაძლებელი იქნება, ამის დასაბუთება დიდ სირთულეს არ წარმოადგენს.
ისეთ პატარა ქვეყნას, როგორიც საქართველოა და ასეთი პატარა ეკონომიკით, იმის საშიშროება აქვს, რომ ანტიმონოპოლიური სამსახურით მონოპოლისტები წარმოიშვებიან? მე ამ აზრს ვერ დავეთანხმები. ჩვენ ახლა მივიღეთ ბანკების კორპორატიული მართვის კოდექსი. იქ ნახავთ, რომ ის ბევრად უფრო მკაცრია, ვიდრე კანონის მოთხოვნა. ბევრად უფრო ზღუდავს ბანკებს, ვიდრე კანონი. სტანდარტები ადის მაღლა და მოთხოვნები არის მეტი. აქედან გამომდინარე, ჩვენ თავს თვითონ დავუწესეთ შეზღუდვები. მე ვთლი, რომ კორპორატიული მართვის კოდექსი უნდა მიიღონ ბევრ სხვადასხვა სფეროში. ეს არის სწორედ ევროკავშირის მოთხოვნა. სანამ ანტიმონოპოლიური სამსახური გაუქმდებოდა, მე ამ სტრუქტურის მიერ გაკეთებული სერიოზული საქმე არ მინახავს. შეიძლება სხვადასხვა საკანონმდებლო აქტებში იყოს გაფანტული ის რეგლამენტაცია, რომელიც ექსკლუზიურად ანტიმონოპოლიურს უნდა ჰქონდეს. ჩემი აზრით, არ არის საჭირო ზედმეტი მარეგულირებლის შექმნა, რომელიც ისევ იქნება ერთგვარი "ბუა", რომელსაც ზღვრების დაწესების უფლება ექნება. ამის გაკეთება არ დააქცევს ქვეყანას, მაგრამ საჭიროება არ დგას".
გიორგი ჭირაქაძე, "საქართველოს ბიზნეს ასოციაციის" პრეზიდენტი, კომპანია "იუ ჯი თი"-ს გენერალური დირექტორი, - "ზოგადად, ჩვენ მეზობლებს რომ შევედაროთ, სადაც ეკონომიკური ინიციატივები საერთოდ არ არსებობს, ის რომ ქვეყნის მთავრობა იჩენს ინიციატივას, ძალიან დადებითია.
ზოგიერთი ინიციატივა არის დასახვეწი და სხვა საკითხი განსახილველია, მაგრამ, ზოგადად, ლიბერალიზაცია მე ძალიან სწორად და მნიშვნელოვან ნაბიჯად მიმაჩნია. ეს ხელს უწყობს სერიოზული ინვესტორების მოზიდვას. ჩვენ უნდა წავიდეთ ქართული მოდელისკენ და დავინახოთ, რა არის ჩვენთვის მნიშვნელოვანი.
ევროპელები კიდევ ბევრს გვთხოვენ, რაღაც კოდექსების გამკაცრებას. დავფიქრდეთ, რას გამოიწვევს შრომის კოდექსის გამკაცრება, - ეს გააძვირებს ჩვენს პროდუქციას და სერვისების, რომლითაც ჩვენ შეიძლება ევროპულ ბაზარზე გავიდეთ. ევროპას კი უნდა საქართველოს ინტეგრაცია, მაგრამ მათ, პირველ რიგში, თავიანთი ბიზნესის დაცვა უნდათ და არა ქართულის. ჩვენ ჩვენ ქვეყანაზე უნდა ვიფიქროთ. ჩვენ ბევრ რამეში მოვალთ წინააღმდეგობაში, მაგრამ ეს არ ნიშნავს, რომ ყველაფერი რაც ევროპელების მოთხოვნაა, მისაღებია ჩვენთვის. ასე რომ, მე გარკვეულ საკითხებში ევროპელებს არ ვეთანხმები. ლიბერალური შრომის კოდექსი, რომელიც ჩვენ უკვე გვაქვს ჩვენი მთავრობის ძალიან დიდი მიღწევაა. თუ ჩვენ საბჭოთა კავშირის შრომის კოდექსზე გადავალთ, ერთადერთი ვინც ამით დაზარალდება, არის საქართველო.
ბიზნესის კორუმპირებულობა ძალიან რთული საკითხია. ბიზნესი არის საბანკო საქმეც, რომელიც კონკურენტულ გარემოში ფუნქციონირებს. მის კორუმპირებულობაზე საბარი ძალიან ძნელია. თქვენ ვერ იტყვით, რომ რომელიმე ბანკი კორუმპირებულია. შეიძლება საუბარი იყოს ინვესტორებზე ან მფლობელებზე, ამ შემთხვევაში, საქართველოში ერთადერთი, რაც შეგვიძლია არის ის, რომ შევედაროთ სხვა ქვეყნებს. საბანკო სექტორის სტაბილურობით, ძალიან ბევრ ქვეყანას ვუსწრებთ. რა თქმა უნდა, არის სექტორები, რომლებიც მეტ-ნაკლებად არიან დაკავშირებული ძალაუფლებასთან, მაგრამ ზოგადად საქართველოში დღეს ბიზნესის მდგომარეობა ძალიან მაღალ დონეზეა, ვიდრე წინა პერიოდში".

მერაბ ჯანიაშვილი