ნანახია: 543

აზერბაიჯანში ”ბაქო-თბილისი-ყარსის ახალი დამაკავშირებელი სარკინიგზო ხაზის რეაბილიტაციის, რეკონსტრუქციისა და მშენებლობის მარაბდიდან თურქეთის საზღვრამდე” საკოორდინაციო საბჭოს ორმხრივი მეშვიდე სხდომა გაიმართა.

შეხვედრაზე მონაწილეობდნენ საქართველოსა და აზერბაიჯანის ეკონომიკის და ტრანსპორტის მინისტრები და რკინიგზის დეპარტამენტის ხელმძღვანელები. ქართულ დელეგაციას საქართველოს ეკონომიკური განვითარების მინისტრი ზურაბ პოლოლიკაშვილი ხელმძღვანელობდა.

საკოორდინაციო საბჭოზე სამშენებლო კომპანია ”აზერინშაატ სერვისის” და შპს ”მარაბდა-კარწახის რკინიგზის პროექტის მართვის ჯგუფის” მიერ წარმოდგენილი იქნა ინფორმაციები გაწეული საქმიანობისა და სამომავლო სამუშაოების შესახებ.

საკოორდინაციო საბჭომ დაამტკიცა მარაბდა-თეთრიწყაროს მონაკვეთის საპროექტო დოკუმენტაცია და მარაბდა-კარწახის რკინიგზას დაევალა გამოაცხადოს საერთაშორისო ტენდერი ამ მონაკვეთზე სამშენებლო კომპანიის დაქირავების მიზნით.

ასევე, საბჭოზე განიხილეს მეორე ეტაპის პროექტები.

საქართველოს ეკონომიკური განვითარების სამინისტროს ტრანსპორტის დეპარტამენტის უფროსის მამუკა ვაწაძის განცხადებით, ასეთი დიდი პროექტების განხორციელებისას მსგავსი შეხვედრები მეტად მნიშვნელოვანი და აუცილებელია მიმდინარე და შემდგომი ეტაპის სამუშაოების დასაგეგმად და შესათანხმებლად.

”ბაქოში გაიმართა რიგით მეშვიდე შეხვედრა. ყველა ასეთ შეხვედრაზე მიღებული გადაწყვეტილებები ევალება შესაბამის უწყებებს განსახორციელებლად. მნიშვნელოვანი ის იყო, რომ გადაწყდა მარაბდა-თეთრიწყაროს მონაკვეთის მშენებლობა-რეაბილიტაციაზე ტენდერის გამოცხადება.

მნიშვნელოვანია ისიც, რომ მარაბდა-კარწახის რკინიგზის პროექტის მართვის ჯგუფს მიეცათ შესაბამისი დავალება, რომ კორექტირება გაუკეთოს და საბოლოო სახით წარმოადგინოს დანარჩენი ორი მონაკვეთის პროექტი. მთლიანობაში მშენებლობა გეგმაზომიერად მიმდინარეობს და დარწმუნებული ვარ, რომ მშენებლობა პროექტით გათვალისწინებულ ვადებში დასრულდება” - განაცხადა ვაწაძემ.