ნანახია: 936

“საქართველოს ბანკში” მიკრო სესხებზე საპროცენტო განაკვეთი 17%-მდე დაწია. საპროცენტო განაკვეთის შემცირება მიკრო დაკრედიტების სექტორში რისკის ფაქტორების შემდგომი გაუმჯობესებითაა განპირობებული. “საქართველოს ბანკის” მიერ შეთავაზებული საპროცენტო განაკვეთი ბაზარზე ერთ-ერთი ყველაზე დაბალია.
ბანკმა ასევე განაცხადა, რომ იწყებს მცირე მოცულობის მიკრო კრედიტების, ე.წ. “ექსპრეს სესხების” გაცემას, მოცულობით 10,000 ლარამდე და ვადით 18 თვემდე. “ექსპრეს სესხის” აღება შესაძლებელია საბრუნავი ან ძირითადი საშუალებების შესაძენად, ბიზნესის სარემონტო და სამომხმარებლო მიზნების დასაფინანსებლად, მიმდინარე ხარჯების დაფარვისთვის და სხვა.
“საქართველოს ბანკი” ანახლებს აგრო სესხების გაცემასაც. აგრო სესხის მაქსიმალური მოცულობაა 100,000 აშშ დოლარი, ვადა- 18-დან 36 თვემდე.
“როგორც ჩვენ ეს წელს არაერთხელ განვაცხადეთ, გაუმჯობესებული ეკონომიკური გარემოს ფონზე, “საქართველოს ბანკი” განიხილავს სესხებზე საპროცენტო განაკვეთების შემდგომ დაწევას. ამ ეტაპზე, მივიჩნიეთ, რომ მიკრო დაკრედიტების სექტორში რისკი შემცირებულია და კარგი ზრდის პოტენციალია. სადღეისოდ, ბანკს აქვს 300 მილიონ ლარზე მეტი მოცულობის ჭარბი ლიკვიდობა, რომელიც გვსურს დაკრედიტებას მოვახმაროთ”, განაცხადა საქართველოს ბანკის გენერალურმა დირექტორმა, ირაკლი გილაურმა.