ნანახია: 684

უმთავრესი მაკროეკონომიკური მაჩვენებელი, რომელიც ყველაზე უფრო ნათელ და სრულყოფილ წარმოდგენას იძლევა ქვეყნის ეკონომიკურ მდგომარეობაზე, არის მთლიანი შიდა პროდუქტი (მშპ). რომელიც შეიძლება განვსაზღვროთ, როგორც ყველა ეკონომიკური აგენტის ერთობლივი შემოსავალი და/ან საქონლისა და მომსახურების წარმოებისათვის გაწეული ეკონომიკური დანახარჯები.
მაკროეკონომიკური პოლიტიკის უმთავრესი მიზანი სტაბილური ეკონომიკური ზრდის მიღწევაა. ეკონომიკური ზრდა კი ვლინდება ისეთი მაკროეკონომიკური ინდიკატორის ცვლილებაში, როგორიცაა მშპ.
საქართველოს ნომინალური მთლიანი შიდა პროდუქტი 2009 წლის პირველ ნახევარში 2008 წლის ანალოგიურ პერიოდთან შედარებით 11,6%-ით შემცირდა.
ეკონომიკის ექსპერტ დავით ნარმანიას განაცხადებით, არამარტო პირველ კვარტალში, არამედ მეორე და მესამე კვარტალშიც, წინა წლის შესაბამის კვარტლებთან შედარებით, ნომინალური მთლიანი შიდა პროდუქტი იქაც დაბალია. მისი თქმით პირველ კვარტლებს თუ შევადარებთ, 2008 წლის პირველი კვარტალი შედარებით სტაბილური ეკონომიკური აქტივობის პერიოდი იყო, ხოლო 2009 წლის პირველი კვარტალი ეს არის პერიოდი, როცა რუსული აგრესიის შედეგად და ფინანსური კრიზისის გამო იყო შეფერხებული ეკონომიკა და სწორედ ეს ორი მოვლენა იყო ნომინალური მშპ-ს ასეთი კლების ძირითადი მიზეზი.
სტატისტიკის დეპარტამენტის ინფორმაციით, 2009 წლის პირველი ნახევრისათვის მშპ-მ მიმდინარე ფასებში 8,117 მლრდ. ლარი შეადგინა. ეს მაჩვენებელი 2008 წლის პირველ ნახევარში 9,178 მლრდ. ლარს აღწევდა.
საანგარიშო პერიოდში მშპ-მ ერთ სულ მოსახლეზე 1 851 ლარი შეადგინა, შარშან ანალოგიურ პერიოდში კი ეს მაჩვენებელი 2 093 ლარი იყო.
2008 წელს მშპ 2007 წელთან შედარებით 12%-ით გაიზარდა და 19,069 მლრდ. ლარს მიაღწია, ერთ სულ მოსახლეზე - 4 351 ლარი.
ნარმანიას ვარაუდით, უახლოესი 2010 წლის პირველი კვარტლის მონაცემები შეიძლება 2009 წლის ანალოგიურ პერიოდთან შედარებით გაიზარდოს, მაგრამ ის 2008 წლის ანალოგიური პერიოდის მაჩვენებლამდე ვერ მიაღწევს.