ნანახია: 1113

ივნისში ინფლაციის წლიური მაჩვენებელი, მაისთან შედარებით, 0,1%-ით გაიზარდა და 2,3% შეადგინა, ხოლო სამომხმარებლო კალათაზე ფასების ზრდის თვიურმა მაჩვენებელმა 0%. შეგახსენებთ, რომ 2009 წელს მიზნობრივი წლიური ინფლაციის მაჩვენებელი 3%-ია.
ოფიციალური ინფორმაციით, ივნისის თვეში ყველაზე მეტად, 12%-ით, ჯანდაცვაზე გაწეული ხარჯები გაძვირდა. 6%-ით მოიმატა სურსათის ფასმა, თითქმის 9%-ით გაიზარდა სასტუმროებისა და რესტორნების ფასები. მნიშვნელოვნად გაიაფდა ტრანსპორტი და საოჯახო ნივთები. ოფიციალური სტატისტიკით, ივნისში ქვეყანაში უმნიშვნელოდ გაძვირდა სურსათი, ალკოჰოლური სასმელები და ჯანდაცვის ხარჯები, რაც ტანსაცმელზე, კომუნალურ გადასახადებსა და საოჯახო ნივთებზე ფასების კლებამ დააბალანსა.
აღსანიშნავია, რომ 2009 წლის დასაწყისიდან მარტის თვის ჩათვლით ინფლაციის წლიური მაჩვენებელი იკლებდა. მარტიდან მოყოლებული საქართველოში ინფლაციის წლიური მაჩვენებელი უმნიშვნელოდ, თუმცა მაინც იზრდება. მაგალითისთვის, 2009 წლის იანვარში თუ წლიური ინფლაცია 4,4%, ხოლო მარტში - 1,6 იყო, დღეისათვის ის უკვე 2,3%-ს შეადგენს.
ეროვნული ბანკის ყოფილი პრეზიდენტის ნოდარ ჯავახიშვილის განცხადებით, დაბალ ინფლაციას ქვეყანაში შექმნილი მძიმე სოციალური მდგომარეობა განაპირობებს, - "დღეისათვის საქართველოში დაბალი ინფლაციის მაჩვენებელს პროდუქციაზე შიდა მოხმარების კლება იწვევს. ქვეყანაში მოსახლეობას სოციალურად უკიდურესად უჭირს, რაც მათ მიერ პროდუქციის შეძენის მოთხოვნაზე პირდაპირ აისახება. ეს ის შემთხვევაა, როცა ინფლაცია არა სებ-ის სწორი ფულად-საკრედიტო პოლიტიკით, არამედ ზოგადად ქვეყნის ეკონომიკაში არსებული კრიზისული მდგომარეობითაა გამოწვეული. ამასთან საფინანსო კრიზისის პერიოდში, მსოფლიო მასშტაბით პროდუქციაზე ფასები იკლებს, რაც, რა თქმა უნდა, ჩვენს ქვეყანაში იმპორტირებულ პროდუქტებზეც აისახება", - აღნიშნავს ჯავახიშვილი.


მერაბ ჯანიაშვილი