ნანახია: 864

საჯარო სექტორის ფინანსური მართვის რეფორმის მხარდაჭერის პროექტი სახაზინო სამსახურის რეფორმირების პროცესის გაგრძელებას წარმოადგენს. რეფორმის მიზანია განავითაროს ინტეგრირებული სახელმწიფო ფინანსების მართვის სისტემა. პროექტი მოიცავს: სახელმწიფო ბიუჯეტის მომზადება და შესრულება, ნაღდი ფულისა და ვალდებულების მართვა, სახელმწიფო ვალის მართვა, შემოსავლების დაგეგმვის მოდელი, სახაზინო ოპერაციები, საბუღალტრო აღრიცხვა, სახელმწიფო შესყიდვები, ადამიანური რესურსების მართვა, სახელფასო ანგარიშგება, ფინანსური აუდიტი და საინფორმაციო ტექნოლოგიებით უზრუნველყოფა.
პროექტის ფარგლებში მიმდინარე წლის პირველ ნახევარში, მსოფლიო ბანკის ხელშეწყობითა და საქართველოს ფინანსთა სამინისტროს სახაზინო სამსახურის ორგანიზებით კომპანია WYG International და PMC Group-მა განახორციელეს სამუშაოები, საჯარო სექტორის ფინანსური მართვის სისტემის ჩამოყალიბების ტექნიკური და ფუნქციონალური დიზაინის (მოდელის) შემუშავების მიზნით.
აღნიშნულთან დაკავშირებით მიმდინარე წლის 18-19 ივლისს, ქალაქ ბათუმში გაიმართება ზემოაღნიშნული სისტემის ტექნიკური და ფუნქციონალური დიზაინის პრეზენტაცია და სემინარი დანერგვასთან დაკავშირებით. ამასთანავე, განხილულ იქნება მიმდინარე საკითხები და სამომავლო სამუშაო გეგმები საჯარო სექტორის ფინანსური მართვის რეფორმის მხარდაჭერის პროექტის მიმდინარეობის შესახებ.