ნანახია: 678

"საქართველოს ბანკმა" მის მიერ დაარსებული კონფლიქტის შედეგად დაზარალებულთა დახმარების ფონდის მიერ, აგვისტოს მოვლენების დროს დაზიანებული, ქალაქ გორის #7 საჯარო სკოლის სარემონტო-აღდგენითი სამუშაოების დაწყების შესახებ განაცხადა. აღნიშნულთან დაკავშირებით, განათლებისა და მეცნიერების სამინისტროსა და "საქართველოს ბანკს" შორის დღეს, ქალაქ გორში, ურთიერთშეთანხმების მემორანდუმი ფორმდება. "საქართველოს ბანკის" დახმარების ფონდმა სკოლის რეაბილიტაციისთვის 404,000 ლარი გამოყო. აღდგენითი სამუშაოები 2009 წლის 1 ოქტომბრისთვის დასრულდება.
2008 წლის აგვისტოში, გორის #7 საჯარო სკოლა დაბომბვის ეპიცენტრში მოყვა და სკოლის შენობა მნიშვნელოვნად დაზიანდა. სკოლაში ჩამოინგრა კედლები და სახურავი, დაზიანდა სკოლის გათბობის სისტემა, ასევე მთლიანად განადგურდა სკოლის ინტერიერი, კარ-ფანჯარა და სასკოლო ინვენტარი.
"საქართველოს ბანკის" დახმარების ფონდი სრულად აღადგენს სკოლის 2,552 კვ. მ ფართობს, რაც სკოლის ორ შენობას მოიცავს. #7 საჯარო სკოლა ერთ-ერთი ყველაზე დიდი სკოლაა გორში, სადაც 1,100 მოსწავლე ირიცხება, პედაგოგიური კოლექტივი კი 73 მასწავლებლისგან შედგება.
"საქართველოს ბანკის" დახმარების ფონდისთვის, გორში არსებული სკოლა რიგით მესამე აღდგენილი სკოლა იქნება. ფონდმა უკვე სრულად აღადგინა, გაარემონტა და სასკოლო ავეჯითა და ინვენტარით აღჭურვა ორი საჯარო სკოლა კონფლიქტის რეგიონში, სოფლებში დიცი და ერგნეთი, რაზეც 609,066 ლარი დაიხარჯა.