ნანახია: 759

საქართველოს ფინანსთა მინისტრი კახა ბაინდურაშვილი საქართველოში მოქმედ ბიზნესგაერთიანებებთან და არასამთავრობო სექტორთან შეხვედრებს განაგრძობს. 11 მაისს შეხვედრა მცირე და საშუალო ბიზნესის კუთხით მომუშავე არასამთავრობო ორგანიზაციებთან გაიმართა. შეხვედრებზე სამინისტროს მიერ მომზადებული საბიუჯეტო ცვლილების პროექტი, საკანონმდებლო ინიციატივები, ქვეყანაში საგარეო თუ შიდა ფაქტორების გათვალისწინებით შექმნილი მაკროეკონომიკური მდგომარეობა განიხილება.
ფინანსთა მინისტრთან შეხვედრაზე შემდეგი არასამთავრობო ორგანიზაციები იყვნენ წარმოდგენილი: "ახალგაზრდა ფინანსისტთა და ბიზნესმენთა ასოციაცია", "საქართველოს ეკონომიკის კვლევისა და ანალიზის ცენტრი", "საქართველოს ახალგაზრდა ეკონომისტთა ასოციაცია", "საწარმოთა ინოვაციური განვითარების ცენტრი", "საქართველოს ბიზნესის ინტერესთა დაცვის კავშირი" "საქართველოს მცირე მეწარმეთა თავისუფალ ასოციაცია", "ქალი და ბიზნესი" და "კავკასიის ეკონომიკური და სოციალური კვლევითი ინსტიტუტი". შეხვედრაზე კახა ბაინდურაშვილმა სამინისტროს მიერ მომზადებულ ფისკალური სტიმულირების პაკეტზე, საგადასახადო და საბაჟო კოდექსებში დაგეგმილ ცვლილებებზე ისაუბრა. ფინანსთა მინისტრმა ასევე არასამთავრობო ორგანიზაციების მხრიდან გამოთქმული შენიშვნები და წინადადებები მოისმინა.