2012 წლიდან საქართველოს საბანკო ბაზარზე ერთ-ერთი წარმატებული აზერბაიჯანული ბანკი - PASHA Bank იწყებს ოპერირებას. იგი აზერბაიჯანის საუკეთესო ბანკების ხუთეულში შედის და საქართველოში მისი შემოსვლის გადაწყვეტილებას სწორედ ბანკის პროგრესული მაჩვენებლებით ხსნიან.
PASHA Bank-ი 2007 წლის ივნისში შეიქმნა, მუშაობის ლიცენზია კი აზერბაიჯანული ცენტრალური ბანკისგან იმავე წლის ნოემბერში მოიპოვა. მიუხედავად გლობალური ეკონომიკური კრიზისისა, ბანკმა შეძლო აზერბაიჯანის საბანკო სივრცეში ლიდერი პოზიციები დაეკავებინა და დღეისთვის ადგილობრივ ბაზარზე 45 აზერბაიჯანული ბანკიდან კაპიტალის მიხედვით რიგით მეორე (123,4 მლნ მანათი), ხოლო აქტივების მიხედვით მეცხრე ბანკია.
"ფაშა-ბანკმა" ძალიან მოკლე პერიოდში მოიპოვა წარმატება და როგორც ცნობილი ხდება, ეს ბანკის მფლობელებითაა განპირობებული. ბანკი აზერბაიჯანული "ფაშა ჰოლდინგის" კუთვნილებას წარმოადგენს, ”ფაშა ჰოლდინგი” კი ფაშაევების ოჯახის, აზერბაიჯანის პრეზიდენტის ილჰამ ალიევის მეუღლის მეჰრიბან ალიევის (ფაშაევა) მამის კუთვნილებაა. აღნიშნულ ინფორმაციას ვიკილიქსზე დაყრდნობით Analitika.at.ua ავრცელებს და იქვე საუბრობს აზერბაიჯანელი ჩინოვნიკების კლანურ ბიზნესების, მათ შორის "ფაშა ჰოლდინგის" შესახებ.
სტატიაში ყურადღება გამახვილებულია ბაქოში სამედ ვურგუნის ქ. #7-ში მდებარე ბინა #3-ის შესახებაც, რომელიც ავტორის მითითებით აზერბაიჯანის ფინანსურ ცენტრს წარმოადგენს. ასევე ცნობილი ხდება, რომ "ფაშა-ბანკი" ამავე მისამართზეა რეგისტრირებული.
აზერბაიჯანის ცენტრალური საარჩევნო კომისიის ვებ-გვერდის www.msk.gov.az მიხედვით, აღნიშნულ ბინაში აზერბაიჯანის პირველი ლედი მეჰრიბან ალიევა და მისი ორი ქალიშვილი ლეილა და არზუ არიან ჩაწერილები.
რეგისტრაცია!
