„ინვესტბანკის" აქციონერის KSN Foundation-ის (72%) მიერ ახლადდანიშნული მმართველი ჯგუფის რეკომენდაციით, ბანკის აქციონერებმა სამეთვალყურეო საბჭოს სრული შემადგენლობა დაითხოვეს.
ბანკის ცნობით, საბჭოს წევრობის კანდიდატურების ვინაობა, რომლებმაც ლევან ხუნდაძე, სერგეი კაპანინი, გიორგი ელიავა, გიორგი ზოიძე და მერაბ ჩიხრაძე უნდა შეცვალონ, კონფიდენციალურია.
ბანკი დირექტორის, ივა სიხარულიძის განცხადებით, ის და გენერალური დირექტორი გიორგი გზირიშვილი თანამდებობებს ინარჩუნებენ. მენეჯმენტის ანალოგიურად ცვლილება არც აქციონერთა სტრუქტურაშია მოსალოდნელი.
სამეთვალყურეო საბჭოს შემადგენლობას უახლოეს მომავალში აქციონერთა რიგგარეშე კრებაზე დაამტკიცებენ.
ბანკის ცნობით, მისი მსხვილი აქციონერი KSN Foundation-ი, ბანკის განვითარებისთვის პარტნიორებისგან რესურსების მოზიდვას გეგმავს.
KSN Foundation-ი „ინვესტბანკის" აქციებს 2008 წლის ოქტომბრიდან ფლობს, შემდეგ კი წილი ყოფილი აქციონერისგან, M&D International Trading A.G აქციების გამოსყიდვით გაზარდა. მასთან ერთად წილი გაზარდა ბანკის მეორე აქციონერმა, Asset Management group-ი, რომელიც „სახალხო ბანკიდან" წასვლის შემდეგ მისმა ყოფილმა დირექტორმა, გიორგი გოგუაძემ დააფუძნა.
28%-ის ამჟამინდელმა მფლობელმა TRENDFOR HOLDING LTD „ინვესტბანკში" Asset Management group-ი 2009 წლის დეკემბერში ჩაანაცვლა.
"ინვესტბანკმა" საქმიანობა 2003 წლის პირველ ოქტომბერს დაიწყო. ბანკის აქციონერები იყვნენ London International Bank Ltd (20,8%), Allied Partners Investments Limited (72,68%), Buadze Enterprises Ltd (6,52%), 93,49%-ის არაპირდაპირი მფლობელი კი ჯოზეფ ქეი იყო.
ნინო შუბითიძე GBC
რეგისტრაცია!
