ნანახია: 716

“ჩვენ ვაგრძელებთ საინვესტიციო პროექტებისათვის ხელსაყრელი პირობების შექმნას. ამის შედეგად, უცხოური პირდაპირი ინვესტიციების შემოდინება გასულ წელთან შედარებით, მიმდინარე წელს გეგმის შესაბამისად 7.7%-ით იზრდება”, - განაცხადა “ბი ჯი კაპიტალის” მიერ კიევში, 23-24 სექტემბერს გამართულ საერთაშორისო კონფერენციაზე საქართველოს ვიცე პრემიერმა გიორგი ბარამიძემ. გარდა ამისა, ბარამიძემ იმედოვნებს, რომ მიმდინარე ან მომდევნო წელს საქართველოსა და ევროკავშირს შორის თავისუფალი სავაჭრო ხელშეკრულების გაფორმების თაობაზე მოლაპარაკება დაიწყება.
კონფერენციაში მონაწილეობა მიიღო მსოფლიოში 70-ზე მეტმა ცნობილი საერთაშორისო საინვესტიციო ფონდის წარმომადგენელმა, რომელთა შორის არიან: Morgan Stanley, Goldman Sachs, Firebird, T. Rowe Price, Och Ziff, East Capital, CIM, Prosperity Capital Management, და JP Morgan. გარდა ამისა, კონფერენციას ესწრებოდნენ საქართველოს, უკრაინისა და ბელორუსის წამყვანი კომპანიების პირველი პირები. ქართულ ბიზნესს წარმოადგენდნენ: “საქართველოს ბანკი”, “ლიბერთი ბანკი”, “თელიანი ველი”, ფოთის საზღვაო ნავსადგური”, “საქართველოს რკინიგზა”, “კაუკაზუს აგროდეველოფმენთი”, “კაუკაზუს ენერჯი ენდ ინფრასთრაქჩა”, “საქართველოს ინდუსტრიული ჯგუფი”, “ჯორჯიან უოთერ & ფოუერი”...
“ბი ჯი კაპიტალის” მიერ კიევში გამართული კონფერენცია საქართველოს, უკრაინისა და ბელორუსის პოსტკრიზისული განვითარების და საინვესტიციო გარემოს მიმზიდველობის საკითხს მიეძღვნა. “კონფერენციის მასშტაბმა ჩვენს მოლოდინსაც გადააჭარბა. ჩვენ ვგეგმავდით, რომ მონაწილეთა საერთო რაოდენობა, ინვესტორებისა და კომპანიების ჩათვლით, რეალისტური სცენარით 100-ს მიაღწევდა. თუმცა, ჩვენ ორჯერ მეტი განაცხადი მივიღეთ მონაწილეობის მსურველთაგან, რაც ერთი მხრივ, უკრაინის, საქართველოსა და ბელორუსის ეკონომიკების მიმართ დიდ ინტერესზე, ხოლო მეორეს მხრივ კომპანიების მხრიდან უცხოური ინვესტიციების საჭიროებაზე მიუთითებს”, - განაცხადა “ბი ჯი კაპიტალის” აღმასრულებელმა დირექტორმა, ნიკ პიაცამ.
აღსანიშნავია, რომ კონფერენციის ფარგლებში გათვალისწინებულია პირისპირ შეხვედრები საინვესტიციო ფონდების ხელმძღვანელებსა და ქართული, უკრაინული და ბელორუსული კომპანიების ტოპ-მენეჯმენტს შორის.

თეონა ჭიტაძე