ნანახია: 836

ანზორ ქოქოლაძის დაკავების ნამდვილი მიზეზები, შესაძლოა, იმაზე ადრე გახდეს ცხადი, ვიდრე ეს მოსალოდნელი იყო

"კომერსანტის" ცნობით საყოფაცხოვრებო ტექნიკის ქართულ ბაზარზე ახალი მოთამაშე გამოჩნდა. "გოუ ელექტრონიკსი" ქართული ინვესტიციით შექმნილი კომპანიაა. ჩვენ ვერ შევძელით დაგვედგინა ქართველი ინვესტორის ვინაობა. ამის თაობაზე ინფორმაციას არავინ იძლევა. "გოუ ელექტრონიკსი" სავაჭრო ცენტრ "თბილისი ცენტრალში" გაიხსნა, რომელიც თბილისის ცენტრალური ვაგზლის შენობაში მდებარეობს და "TBC-ჯგუფს" ეკუთვნის. მაღაზიაში წარმოდგენილია "ეფლის", "ნიკონის", "ქენონის", "პანასონიკის", "სონის", "ნოკიას", "სამსუნგის" და სხვა კომპანიების პროდუქცია, რომელიც საშუალო სეგმენტზეა გათვლილი. "გოუ ელექტრონიკსში" აცხადებენ, რომ `ეფლის~ ოფიციალური რისელერები არიან, მათი ძირითადი უპირატესობა კი ღია შოუ-რუმის კონცეფციაა, რაც საქართველოსა და ამიერკავკასიაში სიახლეა.
საყოფაცხოვრებო ტექნიკის ბაზარი მსოფლიო ეკონომიკური კრიზისის შემდეგ სწრაფი ტემპით იბრუნებს პოზიციებს, იზრდება გაყიდვების მოცულობა, რაც ბიზნესის ამ სეგმენტისადმი ინტერესს ზრდის. სავარაუდოა, ამით იყო გამოწვეული "ელიტ-ელექტრინიკსის" მეპატრონის - ანზორ ქოქოლაძის წინააღმდეგ ლაშქრობა, რაც 2007 წელს დაიწყო და ახლახანს მისი დაუსაბუთებელი დაკავებით დამთავრდა.
ამჟამად საყოფაცხოვრებო ტექნიკის ქართული ბაზრის მთავარი მოთამაშეები არიან: "ელიტ-ელექტრონიკსი", "მეგატექნიკა", "ტექნო-ბუმი", "არაი თუმოროუ" და ახლახანს გამოჩენილი "გოუ ელექტრონიკსი". მალე დაიმსხვრევა მითი, რომ "ელიტ-ელექტრონიკსის" ბიზნესის ხელში ჩაგდებით "თი-ბი-სი ბანკი" იყო დაინტერესებული, რომელმაც კრედიტის დაფარვის ვადის დარღვევის გამო დასაჯა ბიზნესმენი ქოქოლაძე, გამოიკვეთება ამ ბაზრის რეალური ახალი მეპატრონე, ფორმალურად შესაძლოა ორი კომპანიაცკი და ცხადი გახდება "ელიტ-ელექტრონიკსის" ყოფილი მეპატრონის დევნისა და დაკავების რეალური მიზეზები.