ნანახია: 391

მთავრობის სხდომაზე პრემიერ-მინისტრმა 2010 წლის იანვარ-ივნისის ეკონომიკური მაჩვენებლები შეაჯამა. ნიკა გილაური კომერციული ბანკების აქტიურობით კმაყოფილია.

მისი თქმით, ექვს თვეში კომერციული ბანკების სასესხო პორტფელი საგრძნობლადაა გაზრდილი და თუ წლის დასაწყისში სასეხო პორტფელი 5,3 მლრდ. ლარს შეადგენდა, ექვს თვეში იგი 5,9 მლრდ. ლარამდეა გაზრდილი. ასევე 3,4 მლრდ. ლარიდან 3,9 მლრდ ლარამდეა გაზრდილია დეპოზიტების მოცულობა.
პრემიერ-მინისტრის განცხადებით, იანვარ-ივნისში გაზრდილია ასევე ექსპორტის მაჩვენებლები. "ექსპორტის ჯამური მოცულობა გასული წლის ანალოგიურ მაჩვენებლებთან შედარებით 40%-ითაა მომატებული. სტატისტიკური მონაცემების თანახმად, 2009 წლის ექვს თვეში ექსპორტზე 516 მლნ. დოლარის პროდუქცია გავიდა, მაშინ როდესაც 2010 წლის ექვს თვეში, წინასწარი მონაცემებით 719 მლნ. დოლარის პროდუქციიაა საზღვარგარეთ გატანილი," - განაცხადა გილაურმა.
პრემიერ-მინისტრის ინფორმაციით, განსაკუთრებით არის გაზრდილი სოფლის მეურნეობისა და ელექტროენერგიის ექსპორტი. მისი განმარტებით, ექვს თვეში გაორმაგებულია ელექტროენერგიის ექსპორტი, ხოლო სოფლის მეურნეობის პროდუქციის ექსპორტის ზრდა წინასწარი მონაცემებით 25%-ითაა გაზრდილი.
გილაური აცხადებს, რომ საქართველოს მთავრობამ ექვსი თვის ეკონომიკური აქტიობის ანალიზი დაასრულა და სწორედ ამ ანალიზს ეყრდნობა წარმოდგენილი მონაცემები. მისივე განმარტებით, უფრო დეტალურ ანალიზს მთავრობა საზოგადოებას მომდევნო მთავრობის სხდომაზე გააცნობს.