ნანახია: 399

უამინდობის გამო მსოფლიოში ფასები თითქმის ყველა პროდუქტზე გაიზარდა

მსოფლიოს სხვადასხვა ქვეყანასა და კონტინენტზე ამინდის გაუარესება უკვე აისახა საკვები პროდუქტის ფასებზე. ზოგიერთ მათგანზე კი ფასების მატების ტემპებმა შესაძლოა ოქროს გაძვირების რეკორდიც კი მოხსნას.
შეგახსენებთ, რომ ანომალური სიცხეების გამო რუსეთმა ხორბლის მოსავლის წლევანდელი პროგნოზი უკვე შეამცირა და 70–75 მილიონ ტონამდე დაიყვანა. შედეგად, ამ პროდუქტზე ფასები ორ თვეში 50%–ზე მეტად გაძვირდა.
რუსი ექსპერტები შიშობენ, რომ ფქვილის გაძვირება ჯაჭვურ რეაქციას გამოიწვევს და ფასების ზრდა ყველა პროდუქტზე, მათ შორის ხორცსა და ლუდზე დაფიქსირდება.
სპეციალისტების დაკვირვებით, ხორბალზე ფასების ზრდა 1970–იანი წლების შემდეგ ყველაზე სწრაფი ტემპებით მიმდინარეობს.
ხორბლის კიდევ ერთი მსხვილი ექსპორტიორი ქვეყანა – კანადა – ასევე ელის, რომ მისი მოსავალი 2002 წლის შემდეგ რეკორდულად დაბალი იქნება, რისი მიზეზიც ძლიერი წვიმებია.
უფრო ნაკლები ტემპებით, მაგრამ მაინც ძვირდება ბრინჯი. ჩინეთმა, რომლის ტერიტორიაზეც ბრინჯის მსოფლიო მოსავლის მესამედი მოდის, წყალდიდობის გამო, შესაძლოა, მოსავალი 10%–ით შეამციროს. ჩიკაგოს სასაქონლო ბირჟაზე ეს პროდუქტი 30 ივნისის შემდეგ უკვე 15%–ით გაძვირდა.
ფასების ზრდაა მოსალოდნელი შაქარზეც, რომელიც ივლისში უკვე გაძვირდა 22%–ით და ეს ტენდენცია ინდოეთში, პაკისტანში, ინდონეზიასა და ფილიპინებში მარაგების ამოწურვის გამო შესაძლოა კიდევ გაგრძელდეს.
ყავის ფასებმა ბოლო 12 წლის მაქსიმუმს მიაღწია. ძვირდება კაკაოც. ჩაის ინდოელი მწარმოებლები კი, წვიმებისა და მავნებლების მომრავლების გამო, საკუთარი პროდუქციის გაძვირებას ასევე გარდაუვლად მიიჩნევენ.